為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2011 年 05 月 24 日

阿湯僭建唔認又認 一大疑點仍未解

最近政圈人物陸續被揭僭建,建制派同泛民派無一幸免,出事政客反應各異,有人跪低,有人唔認,有人博同情,但講到最戲劇性,要算湯家驊嗰單。佢老哥兩日兩種態度,先撐後認衰,表面上似乎已過關,不過成單嘢仍留低幾個疑問,阿湯必須再講清楚。

阿湯位於大埔康樂園之大宅,上周被踢爆多咗間玻璃屋,傳媒立即窮追猛問,佢老哥出奇咁淡定,大大聲話自己冇違法,因為幾年前佢代表信和打一單「踢契」官司,當時上訴庭判詞講明,在天台加建亦屬「屋內改建」,只要冇涉及建築物結構,就可豁免,所以佢間玻璃屋並非僭建物。

但一日之後,屋宇署就踢爆指,終審庭最後推翻咗上訴庭呢個講法,即係話,天台加建玻璃屋乃屬違規,湯大狀唔好亂噏喎!港大法學院助理教授張達明翻查法院文件,亦證實有咁嘅事,認為阿湯有誤導公眾之嫌。形勢忽然逆轉,阿湯自知冇法再撐,於是第一時間認錯,話自己一時疏忽,冇留意終審庭嘅判決,所以搞錯咗,已即刻搵工程師睇吓點處理。

阿湯唔認又認,進退失據,表現相當之肉酸,更重要係,成件事仍有一個地方令人疑惑不解,可以再追落去。本刊記者再細閱終審庭嘅判決書,上面寫明阿湯係代表律師之一,換言之,單官司上訴到終審庭,佢老哥一直有份參與,仲擔當主要角色,冇理由唔知道終審庭判詞嘅內容,就算當時唔知,事後都應該睇番份判詞,研究終審庭點裁定何謂僭建,以便向客解釋。阿湯咁講,的確幾奇怪。

湯家驊大宅僭建玻璃屋(圓圈),成件事有一大疑點:他是否知道終審庭已裁定此類建築違法?

僭建玻璃屋揭發後,阿湯第一日只提上訴庭判例,冇講終審庭之判決,有兩個可能性:第一係佢的確唔知,如果係咁,大家就會問:佢作為資深大狀,打官司要睇晒案例,唔應該連咁重要嘅法律觀點都忽略咗;第二係佢可能知道,但第一次回應傳媒時,講啲唔講啲,以為可以甩身,若然如此,就涉及誠信,問題更加嚴重。究竟實情係點,希望佢老哥再作詳細解釋。

阿湯不愧係善辯高手,除咗迅速開脫,仲將矛頭轉向屋宇署,指該署人員一見報就上門調查,行動異常迅速,顯然有針對性「親疏有別」。部分傳媒跟住佢嘅口徑砌政府,阿湯瞬即由被告變為受害人,屋宇署調查竟成了「白色恐怖」。