主頁 > 專欄 > Paco巨星飯堂 > 理想舞台 2011 年 05 月 27 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

理想舞台

舞台劇一向係文化平台，所以「金牌飯局」今次特別邀請3位舞台劇界精英：陳文剛（Rensen）、魏綺珊（Jo）同黃建東（Derek），細說佢哋藉舞台追逐理想嘅過程。

你哋認識嘅魏綺珊，多數係透過新聞報道，而今晚喺「金牌飯局」嘅Jo，就較貼近現實，而且對舞台劇充滿熱誠，哈哈哈！可以話係大家少見嘅一面！

所以，我挑選咗位於銅鑼灣Cubus嘅「皇府粥麵廚房」，邀請埋老闆娘Crystal，特別為3位嘉賓講解餐廳粥麵以外嘅特色菜式。食，都要講理想o架！

「作死」解說

由Rensen領導嘅「糊塗戲班」，即將有兩套舞台劇公演，分別係喺5月26日重演嘅《安娜與陳七》，同喺6月1日至5日第5度公演嘅《靚太作死》，Rensen身兼導演、編劇、演員，與太座Jo喺舞台上合作。「《安娜》係由我同太太合作寫嘅小說改編成舞台劇，係《靚太》嘅前傳，講述男女主角由相識、拍拖、結婚嘅故事。至於《靚太》就改編自諾貝爾文學獎得主Dario Fo嘅劇本，係Jo繙譯嘅。」

Rensen一有停頓，Jo就有默契地補充：「我一向都好鍾意閱讀，喺睇《靚太》原著《The Open Couple》嘅時候，我覺得呢個劇本好峰迴路轉，往往睇到以為係結局之際，揭開另一頁又有出人意表嘅情節出現，演起上嚟好過癮。

講到舞台劇，Jo（左）與Rensen（右）兩公婆都一本正經。

「劇名叫《靚太作死》嘅原因，係因為男女主角係一對夫婦，丈夫喺外面拈花惹草，令到個太太就要生要死，於是就出現咗『作死』嘞。」

哈哈哈！既然Rensen同Jo可以將角色生動演繹，我就想知道佢哋演繹嘅時候有冇投身現實嘅生活情節嘞！Rensen話：「演呢個劇嘅出發點係我哋睇到依家愈嚟愈多感情糾紛，所以藉喜鬧劇包裝去畀觀眾反思。」Jo「接力」回應：「咁我哋都關心時事，可以借鏡而唔使有切身經驗同感受嘅。」

凍醉翁蝦（$98/隻）蝦鮮且帶酒香，夠醒胃。

皇帝燉農場雞（$228）嘅雞極嫩滑，值得一試。

胡椒炒蟹（$198）非常惹味。

陳皮焗魚腸（$88）呢味懷舊菜式，「皇府」炮製得一流！

盡現默契

現場所見，Rensen、Jo夫婦二人非常合拍，我化身Jo同行，訪問一下陳太欣賞陳導演嘅原因，Jo不加思索答我：「佢個人好真，同埋好有才華。」而身旁嘅Rensen即時笑得腼腆，哈哈哈！我相信佢哋不論喺台上抑或生活上，都係最佳拍檔，舞台劇就係佢哋共通語言，而佢哋嘅默契已凌駕一切！

Jo話佢哋夫婦對食偏向簡單、隨意，我即問Rensen有何見解，佢即一副愛妻號姿態話：「都係o架！」

Jo係「新聞之花」，講到舞台劇，佢就即刻回復主播本色，正經晒，「我覺得舞台劇係一個好特別嘅媒體，要所有演員、燈光、服裝、布景配合，一take過畀觀眾感受整個故事，同電影、電視唔同；而且觀眾嘅反應亦都係即時，不論笑聲、掌聲，甚至無反應都係場場唔同，亦係最特別之處。」

講到重演嘅《安娜》，Rensen話今次稍稍改動過情節，「會濃縮少少，比上次嘅時間短少少。除咗我哋兩個之外，仲有兩個演員，分別要一人分飾廿幾個角色，其中一個係Derek，由售票員、路人等等個個都由佢哋包辦。」

Derek演出嘅時候要同時間競賽，而佢同Rensen嘅合作就完全冇競爭，「之前我喺香港話劇團嘅時候已經有留意導演嘅作品，跟住我就膽粗粗send咗份履歷畀佢，於是就開始咗同導演合作。」

咕嚕炒豬爽肉（$88）係呢一晚最值得推介嘅菜式，除咗選用咗豬頸最滑部分炮製外，不論味道，炸粉厚度都係冇得彈！

羅漢齋腸粉煲（$88）清淡中滲出點點層次。

多棲發展

Derek喺舊年就試過自編自導自演一齣獨腳戲《少男赤裸私誌》，但係喺《安娜》入面，佢以唔同造型唔同聲線演繹19個角色，由的士司機到港女都有，「導演要求好嚴格，要我搵19把聲同動作去演繹19個角色，其中一個造型係着吊帶裙高踭鞋嘅靚女，仲要露bra挑逗男主角，但導演就要我用一把老牛聲去演繹，帶出喜劇感。」

喺戲劇上有所發展之外，Derek仲喺唱作路上努力，「暫時我都係努力喺創作方面，之前開過一個mini concert，蕭正楠聽過我其中一首歌〈為你祝願〉，話好想唱我呢首歌，希望可以成為電視劇《法證先鋒》嘅插曲或者片尾曲啦！」

努力之外，仲要有機會幫助，好似「皇府」咁，進駐Cubus之後，Crystal再加上新元素，令餐廳更多元化，「因為做粥麵仲要上樓食，生意會更加難做，咁啱又畀我遇上一個好廚師龍師傅，所以可以設廚房，將舊有嘅粥麵之外再加上其他菜式，更多元化。」