京官倡駐京辦 增設金融專才
香港人民幣業務愈做愈大，一言上周跟北京一名財金官員食飯，京官朋友非常欣慰，話香港人民幣業務發展得唔錯，仲將功勞歸於金管局總裁陳德霖，指佢一直默默推動喎。
不過提到港府同內地官員嘅溝通，京官朋友就略有微言，暗示香港駐京辦未有好好發揮作用：「駐京辦主任是曹萬泰，但對我們來說，還是不夠的……」佢建議港府諗諗，喺駐京辦增設金融專業人才，咁平時同不同部委溝通會方便啲。
有京官畀個「like」金管局總裁陳德霖，大讚佢推動本港人民幣業務做得唔錯。
一言以前聽聞內地唔少部門，都話港府唔喺幾識同佢哋打交道，其後港府增設內地辦事處，情況改善咗唔少。據聞港府有個「每事問中央」嘅習慣，京官朋友笑笑口話香港發展人民幣業務，中央一直持開放態度，港府可以放膽做：「沒事的，那些外企發人民幣債券，完全沒問題，不用每出一個產品都要問准中央！」
港府也非鐵板一塊，京官朋友就點名讚財經事務及庫務局副局長梁鳳儀，同政制及內地事務局局長林瑞麟。梁鳳儀來自金融界，專業知識毋庸置疑，但林瑞麟都算厲害，搞政制搞到連財金官員都讚？聽聞林局長手腕靈活，內地官員較為受落。早前有位資深政經界人士同一言打賭，話林瑞麟下屆會做司長，咁邊個司呢？他竟然話：「三個司都得！」律政司都做到？「人哋讀過Lawo架！」一言為求呃餐飯食，求神拜佛林局長官運亨通。
