政府嬲到爆 同公民黨徹底反面
公民黨一招打窒港珠澳大橋工程，搞到政府雞毛鴨血，上訴官司起碼要打一年半載，手頭多個基建項目，部分hold住等上訴結果，其餘要重做環評，「災情」十分慘烈。但公民黨呢鋪亦成輸家，除咗民望大跌，政府被玩殘嬲到爆，將同公民黨徹底反面，以後大家好難再合作。
官場好友話，公民黨今次玩到咁狠辣，政府高層極之憤怒，只因事件已進入司法程序，唔可以公開口誅筆伐，但條氣已頂到上心頭，到完晒官司就會爆出嚟，實行大控訴。
佢話，過往政府同公民黨在某些範疇都有合作，亦願意吸納其成員加入公共機構，畀佢哋參與決策，例如陳淑莊就一直係市區重建局嘅非執行董事，有份入board，可以一齊討論重建政策同睇有關文件。但經過今次事件後，官員覺得以往當佢哋係friend，但對方竟玩到咁盡，以後好難再搵佢哋做公職位，亦再冇合作基礎。
政府反枱，公民黨肯定無着數。因為黨員加入建制架構，可以多啲曝光show自己做實事，如果冇晒公職，就同社民連冇分別，民望將進一步下跌。
