為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2011 年 05 月 18 日

大班重金挖角疑幻疑真 掀電台風雲

鄭經翰(大班)個新數碼電台最快十一月啟播,山雨未來已風滿樓,江湖傳聞迭起,話佢已開始四出獵食,擇「星級DJ」而噬,而且出手極之闊綽,動不動一千幾百萬。港台王牌主持梁思浩上周末突然被中止工作,立即封咪,據聞跟大班挖角有關。小弟打聽後得知部分實情,同坊間傳聞有唔少出入,值得向大家報吓。

大班開台在即,急於埋班,近月的確同一批名DJ及電台主持人斟過數,其中亦包括港台晨早節目《瘋Show快活人》主持梁思浩,不過各人都只係口頭上話有興趣,冇人簽過約。但近日有人放出風聲,話大班已落實以三年合約一千五百萬挖梁思浩過檔,講到似層層咁,港台高層聽到消息後大為緊張,擔心挖角陸續有來,必須立即採取防範措施。

鄭經翰確曾搵過梁思浩傾過檔,但未落實,傳聞薪酬千幾萬,絕冇咁多。港台先下手為強,封佢咪以殺一儆百。大班亦同李慧玲斟過,但冇下文。

上周港台先下手為強,負責人周偉材及馮偉棠急召梁思浩見面,提出要佢簽約一年,條件係畀多啲job佢做,變相加佢薪(加埋原來嗰份,收入去到助理廣播處長level),目的係綁死佢。但梁思浩耍手擰頭,話要諗過先,想拖多幾個月等確定份新工至劈炮。

港台高層見佢唔肯就範,擔心單嘢引發連鎖反應,《瘋Show快活人》另兩個主持貴花田同曾志豪都跟埋過檔,其他DJ亦會軍心動搖,於是決定殺一儆百,同梁思浩最後攤牌,話停止佢嘅主持工作,原因係佢曾經帶貴花田同曾志豪見大班傾過檔,港台好難再同佢合作,所以十七年關係到此終結。

呢個罪名其實有啲寃枉,梁思浩陪兩人於兩年前同大班在馬會飯敍,當時有其他電台DJ在座,唔係見工,其後大班的確分別見過兩人傾過檔,但都係單獨會面,同梁思浩無關。

港台今次其實唔使出手咁猛,一來梁思浩係咪跳槽大班電台並未落實,二來坊間傳聞嘅「身價」純屬吹水,行內人都知道極流。據小弟所知,大班嘅「數碼廣播」至今未同任何電台主持人簽約,已返工嘅二十幾人,全部係全職工作人員。大班近日陸續有同名牌DJ傾,但暫時得個「傾」字,冇人實牙實齒話落水。

傳聞大班以年薪三百萬斟蘇施黃,睇嚟亦只係吹水消息。

至於話梁思浩過檔可獲三年共一千五百萬酬勞,更加得啖笑。條數好易計,大班個新電台話未來六年預計投資六億幾,扣咗購買設備,每年營運開支唔夠一億,如果一個DJ都要年薪五百萬,淨係請主持人就花幾千萬,仲有錢出糧畀其他夥計?

行內對有人傳出呢個銀碼,有兩個推測,一係梁思浩同人吹到咁大,以提高自己叫價;一係大班自己放出消息,既可增加電台聲勢,又可令其他DJ心郁。實情係點,暫時未知。

傳聞又指大班出到三年七百五十萬請商台李慧玲過檔,同樣不可置信,以大班電台嘅財力,應畀唔起呢個價錢,亦冇需要畀得咁勁,因為行內估計李慧玲年薪亦只不過一百萬左右,冇理由身價突然炒到咁高。大班年前確曾斟過李慧玲(當時被本刊記者影到相),但對方都只係諗吓諗吓,因為商台個平台好好多,可以keep住知名度,大班個新電台幾多人聽冇人知,除非開出天價,否則博唔過。

關於呢次挖角風波,本刊記者搵大班詢問,佢話:「數碼廣播確曾斟過梁思浩,但未落實,港台封佢咪可能會促成佢過檔。至於梁思浩三年可獲一千五百萬,絕對冇咁多。」