為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2011 年 05 月 22 日

一個女人的快樂之道

我本性樂天,所以討厭怨婦,做女人已經夠辛苦了,為甚麼還要每日怨天怨地?這大概就是我喜歡曾華倩的原因。

人到中年,既是失婚婦人,又是單親媽咪,既要為口奔馳,又要身兼父職,其實曾華倩已有足夠的理由去當個怨婦了。

然而她卻寧願享受着單身女人仔的生活,一切隨遇而安,把焦點放到生活上的細微細眼處,努力做好自己的每個演出,閒時陪陪小朋友,到街市買買餸,或跟好姊妹們聚聚。看她的微博分享內容:和兒子來個簡單的下午茶、把心愛的化妝箱修補了、晚上吃到很想吃的士多啤梨、與歌神張學友來個合照,原來都夠她快樂半天。

「我真心覺得,我現在過得很開心,我亦相當享受現在的生活!」這是她在訪問中多次強調的說話。

令自己快樂,可以有無限個原因,每個人都不同。華倩說,最重要還是懂得知足,好好珍惜眼前擁有的。「世事無常,做人唔好搞咁多嘢,最緊要開心,享受活在當下,已經可以好精采!」

充滿正能量又爽爽直直的女人,我堅Like!

感情生活

早前看《心有靈犀》,每集總見曾華倩聽嘉賓說愛的宣言時,聽到眼紅紅,人們以為她是感懷,實情她只是感動。「我覺得每個人只要真心說出自己的故事,就已經好動聽!」皇帝唔急太監急,她自○二年跟前夫林肇基的六年婚姻畫上句號後,外界總是很關心她的感情生活,所以年前她跟馬國明傳出姊弟戀,即得到很多人受落。「嘩!呢段緋聞係真o架,真到不得了呀!」說時她反晒白眼,語氣相當藐。

我諗觀眾都好想我講呢句囉。

梁朝偉和曾華倩曾經是羨煞旁人的一對,現在也是很好的朋友。

唉,呢個話題好悶!我講過幾多次,都係沒完沒了,如果嗰個真係我男朋友,我會唔緊要,但如果唔係,就唔好作咁多故事出嚟囉!

可能外界覺得我哋好夾、好似好襯咁,我唔知喎……或者我重新考慮吓呀,哈哈哈哈!但其實我同佢只係朋友,依家只會喺公司見到面嘻哈幾句咁,冇聯絡。

我嘅感情生活,真係唔使擔心,我自有主張!其實依家都有人追,但我好怕狗仔隊,可能食餐飯都會被影到相,冇咗個發展空間,我都唔想嘥大家時間!或者我暫時仲未遇到一個可以令我唔諗咁多嘅真命天子啩,但我又唔會刻意去搵,又唔會抗拒,隨緣啦,我自己未係好想拍拖,我真係好享受依家嘅單身生活,有拖拍唔一定得到開心,追求快樂唔一定要有個男人。

暫時對我嚟講,可以話係一個悠長假期。

○七年重返TVB拍《古靈精探》,結果跟馬國明傳出姊弟戀緋聞。

自我調節

曾華倩說,她是個典型的獅子座,在人前總愛嘻嘻哈哈,有心事卻會選擇閂埋房門,獨個兒去面對—即使是當年面對婚姻破裂,她都不會對外界顯得鬱鬱不歡。

當年離婚,比我想像中復元得更快。

我喺感情方面,某程度上EQ幾高,自己唔開心,我會匿埋喺房,自我調節好才會出番嚟見人,有好多嘢都係自己去控制,朋友緊要,但最重要都係自己幫自己解開個結,如果自己幫唔到自己,所有人都幫唔到你!

我覺得兩個人分開,唔一定代表唔好,兩個人嘅相處係一個學問,始終每個人追求嘅嘢都唔同,當大家唔係行同一條路時,分開走各有各嘅生活,可能大家都會活得更精采,係完全冇問題!唯一嘅問題係個小朋友,如果大家都同樣咁愛個小朋友,其實係冇問題,我前夫依家都有同我個仔見面同相處,冇問題喎!總好過喺個小朋友面前日日嘈喧巴閉,或者各自唔理個小朋友,得工人帶大,得物質,咁咪仲更加影響個小朋友!

依家呢個年代,一定要畀個小朋友知道你好愛佢,因為佢係feel到o架

八十年代曾有報導指,因為梁朝偉,令曾華倩和劉嘉玲反目,但曾華倩卻說,其實彼此間根本沒有不妥。

早前和田蕊妮主持《心有靈犀》,每集都令曾華倩眼紅紅。

單親教育

作為一個單親母親,曾華倩很驕傲這個身份,並沒有令她的仔仔Martin心靈上感到有所缺乏。她跟他相處,既是母子又像朋友,在教育上,她不愛施予壓力,更不愛香港的教育制度。

我管得我個仔最緊要嘅,係佢嘅品行,我只要求佢做每樣嘢係認真同畀心機去做,得失結果唔重要,最緊要係有冇付出!因為我淨係想個仔做一個開心快樂嘅好人,千祈唔好做壞人!

至於學業方面,我唔使佢做最高嗰個,但當然亦唔好做最差嗰個。其實我唔係好鍾意香港依家嘅教育方式,點解小朋友書包咁重?放假都要一大堆功課呢?放假咪放假囉!點解個個小朋友都要十八般武藝呢?張張刀冇把利嘅話,又咪係把鬼!

我只會睇我個仔邊方面有興趣先谷佢,唔係逼出嚟,佢起碼唔會覺得受苦。佢鍾意游水,依家十二歲,已經高我半個頭,我自己唔識游水,有時同佢出去玩,我都會叫佢教我,成個男朋友咁!

貪生怕死

由當家花旦,到轉型為電台、電視台節目主持,由人妻到成為了單身媽咪,曾華倩說,她的人生總括來說,已經很幸福很精采。要數令她人生得到最大啟發性的事,則是兒子Martin出世。

我覺得女人始終要生過BB,先可以成為一個真正女人。

以前未有時,失驚無神想去旅行,買張機票就話去,話走就走,冇牽掛,唔需要諗咁多嘢;但生咗小朋友之後,我好驚坐飛機,有啲坐飛機恐懼症,因為我怕死!

如果我死咗,咁佢點呀?我唔死得o架喎!我好驚自己有咩事照顧唔到佢,我個小朋友仲細,只得十二歲,唔係唔識自己照顧自己,但都仲係需要人照顧嘛。

閒時跟一班好姊妹們相聚,亦是她生活的另一種快樂來源。

有咗小朋友之後,雖然責任係大咗,但個小朋友畀你嘅歡樂係好開心!有時都會激吓你,尤其是依家我個仔啱啱開始青春期,有次同我講:「媽咪,我依家係青春期,你忍我幾年呀!」我聽完之後覺得好好笑,我心諗:點解要我忍你幾年?然後我就答番佢:「媽咪忍得你幾耐就幾耐啦,如果我忍唔到都冇辦法!」哈哈哈!

我依家如果唔使返工嘅話,我有好多時間都係同個仔一齊,我好enjoy同佢相處,尤其是男仔,到佢讀咗中學,就會有佢自己一班朋友,好快就會有佢自己嘅世界,我亦唔希望佢好似裙腳仔咁黐住我。所以我喺呢段仲可以同個仔相處嘅日子,我都盡量去享受呢個階段,因為呢啲日子好快就走o架啦,之後想佢黐番我都難!

幾個月大的Martin,超可愛!

曾華倩把自製的搞笑仔仔相片,放到微博去。

今年母親節,仔仔Martin親手製作了一個小心心送給媽咪,so sweet!

那個美好的年代

今年八月生日後才四十六歲的曾倩華,八二年藝訓班還未畢業,便已經主持《430穿梭機》,正式入行拍的第一齣電視劇,是王天林的《雪山飛狐》,飾演苗若蘭,因為角色和外形討好,結果劇集一齣接一齣,成為了那時的「當紅炸子雞」之一。

「那個年代的電視台花旦小生,個個都要捱。我最記得有段日子,我要拍《靜待黎明》,同時又要客串《倚天》同《黃金十年》,試過三日三夜冇瞓過,攰到自己都唔知拍緊乜!有日拍一場小巴戲,一句對白,我都攰到記唔到,辛苦到我忍唔住喊,惟有求導演畀我返屋企瞓幾粒鐘……我依家諗番,真係要多謝公司當時畀我咁多機會,青春有過呢啲經歷,真係好難忘!」

查實,當時還是黃毛小丫頭的我,認識螢幕上的曾華倩並不多,反而多得我姐姐買回來的《乜乜電視》、《物物電視》,才讓我學識跟人儲當時幾位花旦小生的剪報和相片……睇雜誌多過睇電視,結果,三歲定八十。

八十年代當紅時的曾華倩,間中也要上綜藝節目表演雜技。

話晒是當年的當紅花旦之一,曾華倩那時拍過的封面,當然不止這麼少。

不看曾華倩的舊照也不記得,譚玉瑛姐姐原來在《430》時代已是兒童節目主持。