最低工資 累死經紀行
最低工資法例剛實施半個月，各行各業已出現層出不窮嘅問題，特別係地產經紀，更加首當其衝。呢行向來係以佣金行先，老底（基本工資）係其次，最緊要睇你做唔做到生意。但經紀份老底只係約莫五千銀，即係日薪百六蚊，以每日工作八小時計，時薪得廿蚊，絕對唔符合最低工資嘅要求。
面對困境，有經紀行就諗橋，部分走灰色地帶，將經紀全年佣金加上老底去計算，拉拉扯扯都可以過骨，之但係有啲行因為請咗唔少未有牌嘅準前線經紀，未可以上戰場搏殺，又或者成年佣金唔係好高，咁就有好大問題。
好似近年急速擴張嘅利嘉閣，就係其中一間受害經紀行，佢哋董事總經理廖偉強話，因為最低工資實施，公司要調整啲經紀份老底，每月營運成本額外增加近兩百萬，一年下來就要加千幾兩千萬！他坦言，起碼要觀察一季，先可以評論公司所受嘅影響有幾深。
一言又聽聞，有啲經紀行就作出調整，將底薪調高，但佣金分成就調低，希望可以減低最低工資所受影響。
