釣錯金龜 媾錯仔
上周有報道話僑豐證券董事總經理林賽盈畀佘詩曼搶老公，又話個男人係僑豐董事，年薪幾百萬。佘詩曼即時回應話絕對唔會做啲咁嘅事，林賽盈夫婦亦發聲明否認，有業界老友笑言，若果傳聞係真，呢次花旦真係「釣錯金龜媾錯仔」喇。
林賽盈嘅老公叫蕭猷華，喺僑豐只係零售部經紀，年薪有冇幾百萬真係成疑，你知經紀三更窮五更富，市好時連埋佣金可能有都唔定，但絕對唔係非常有錢級數。有時真係要奉勸各位花旦，揀男人千祈唔好只睇卡片，事關「董事」呢啲銜頭成街都係，一間稍為大型嘅證券行，隨時有一百幾廿人。
外傳佘詩曼搶咗財經名嘴林賽盈（左）老公，雙方都強烈否認。
除咗距離「金龜」頗遠之外，蕭猷華都幾黑仔，○四年蕭生被證監檢控及吊銷牌照四個月，被指「進行未獲邀約的造訪，誘使他人買賣在日本商品交易所上的期貨合約」，違反《商品交易條例》，被判罰款五千銀，仲要向證監會支付調查費用。
林賽盈近年曝光率幾高，佢個樣都算甜美，成日上電視講市況，鬼咁勤力。之前林賽盈出過本書，叫做《黃金機遇——商品大牛市獲利之道》，喺自序仲點名要多謝生命中五個最重要男人，父親排首位，丈夫蕭猷華第二，佢話：「每當工作遇有挫折時，他（丈夫）係最佳聆聽者，當感到沮喪時，除了鼓勵，更把我帶回平坦的道路。」
