為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2011 年 05 月 20 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

夠薑巨聲

我一向都欣賞積極嘅年輕人,所以今晚我就邀請咗第一屆《超級巨聲》嘅3位中流砥柱——許廷鏗(Alfred)、何雁詩(Stephanie)同駱胤鳴(「烙印」),連同陳美詩(Macy),同我一邊品嘗「合江小鎮」糅合川菜同淮揚菜嘅精點美食,一邊大談佢哋嘅演藝之樂。

4位年輕人既講音樂又講演戲,唔使我多講,你都知道飯局嘅話題同笑聲都不絕。而一眾「巨聲」食過川菜嘅辛辣菜式,連發言都特別夠薑夠真心,哈哈哈!我鍾意!

今晚我同「巨聲」們「烙印」、Alfred(左一、二)、Stephanie(右一),以及Macy(右二)品嘗川菜及淮揚菜式,以乾杯揭開序幕。

先聲奪人

當我正想問即將出個人大碟嘅Alfred認為自己有何特別之際,佢嘅戰友Stephanie同「烙印」即異口同聲講:「將軍澳吳尊!」哈哈哈!原來呢個正正係Alfred首先令人留下印象嘅「特色」。「係呀,因為參加《巨聲》期間,有好多人都覺得我似吳尊,所以咪咁叫我囉。不過,我依家就好努力咁擺脫呢個所謂嘅稱號。」

Alfred(左)提出嘅廣東歌問題,其實我同阿Mark(雷頌德)都有討論過,今晚聽吓年輕人意見,集思廣益。

一定要!藝人始終要有個人嘅特色先可以紅得持久!活喺人哋嘅影子之下,絕對係下下之策。而Alfred仲帶出另一個值得香港音樂人深思嘅話題,「早排我喺我嘅blog上面問過一啲網友,覺唔覺得廣東音樂局限咗喺某啲音樂類型,好似我唱過嘅歌咁,廣東歌係唱ad-lib(即興)嘅時候,係比英文或者國語歌難掌握得好。Paco,你專業啲,你覺得係咪呢?」

廣東歌喺某啲音樂類型上係有啲難度嘅,好似近年流行嘅hip-hop同R&B咁,用廣東話演繹的確係比英文、普通話冇咁討好,而新一代又受呢兩類型嘅音樂影響較深,先顯現出廣東歌呢一個「低潮」啫。其實音樂係唔受言語影響嘅,只要感動到人心嘅就係好歌,所以我都要寄語一眾「巨聲」,唱歌,首要係講feel,唱得出歌曲嘅feel,比唱出100%啱音更加困難,有feel,就更容易先聲奪人!

川式三小碟各具特色,嘉賓們一致推介蒜泥白肉,夠醒胃。

乾燒大明蝦($100/隻)採用嚟自青島嘅大明蝦,配合泡椒及酒釀,香味撲鼻。

外婆紅燒肉($180)係著名淮揚菜,五花腩經炒過後冇晒肥油,入口軟而不膩。

雞火煮干絲($180)選用新鮮揚州豆腐乾炮製,切絲極考刀功。

身兼多職

Alfred有新歌〈出走〉派台,大碟又如箭在弦;Stephanie就先以學業為重,「我今年就要讀大學,所以要加倍努力喺學業方面,我希望可以完成大學課程先全力出擊。舊年要參加亞運(Stephanie為香港高爾夫球選手),今年就要為入讀大學而努力,唱歌方面我都想兼顧,媽咪就叫我以方力申為榜樣,因為當年佢都係兼顧運動、學業、演藝三項而又做到好成績吖嘛!」

Macy(左)同Stephanie(右)對魚香帶子情有獨鍾。

哈哈哈!小方嘅意志力就正如佢當年係專業運動員咁厲害,我記得佢初入行嘅時候,一日廿四小時佢就用咗二十小時去練水、讀書、唱歌,如果唔係專業運動員,都好難有咁堅韌嘅信念,希望Stephanie都可以秉承呢種「運動員精神」。以我多年嘅經驗,對一個藝人,我只寄望「good luck, goodbye」,good luck係指佢可等到一個機會爆紅,當中最好有啲實力、有包裝支持;否則就只可同佢say goodbye嘞!

「烙印」點頭表示明白,咁妳又有何目標?「我好易滿足o架,我好鍾意張學友,希望佢可以揀我作嘅歌演繹啦!(我:「哈哈哈!好似王菀之咁,咁就係『我真的開心了』!」)係呀!哈哈!

「依家我都係學習當中,無論係唱歌或者創作都係,所以要再努力啲!」

老壇子蟹($320)乃餐廳川菜大師鄧華東師傅自創,以十多種配料炮製。

蜀府掛爐烤鴨($120/半隻)以果木作木炭,令鴨烤得更香,味道層次豐富。

魚香帶子($180)採用由四川入口嘅泡椒水炮製,用料新鮮。

挑戰極限

一眾「巨聲」之外,Macy亦認為自己要對演戲方面再下苦功,「我有諗過讀心理學去了解唔同人嘅心理狀況,特別係精神上break-down嘅人,我好想了解佢哋究竟諗緊咩o架

「依家我對演戲嘅興趣愈來愈濃,唔多唔少都係因為透過演戲我可以了解到唔同人嘅心態,目前我最想嘗試嘅角色係變態殺手,應該可以誘發到我一啲較唔理性、鍾意施虐嘅黑暗面出嚟。」

哈哈哈!咁Macy男朋友孫耀威就要分外小心嘞!「近排OK,佢唔喺香港!」嘩!Macy真係坦白得可愛!

今晚有音樂上嘅生力軍,又有對演戲充滿熱誠嘅嘉賓,我祝佢哋可以喺娛樂圈闖出屬於自己嘅一片天,乾!

Macy(右)講起「虐待男友」就即刻笑個不停,果然係有潛質飾演變態殺手!

今晚嘅菜式既具特色亦有個性,一眾嘉賓經常大讚「好味!」。

再踏紅館

講到3位「巨聲」嘅短期目標,佢哋都有共同志向——再踏紅館舞台,Alfred話:「其實我最希望可以擁有一個屬於自己嘅world tour,當然我知道呢個係長遠嘅目標啦!所以我就先訂一個較容易達到嘅夢想,即係喺紅館開演唱會,再循序漸進達到開world tour呢個目標。」

哈哈哈!好!有夢想有目標先係真正嘅原動力,我預祝佢哋人人達標!

Alfred


合江小鎮

地址:香港皇后大道東387-389號麗都酒店一樓
電話:3167 7833