為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 時事速報 2011 年 05 月 11 日

米蘭站有A貨?

五月份唔少新股排隊上市,但大市反覆偏軟、一啲集資額大,業務較沉悶嘅新股,啲人未必有興趣,細細粒大眾又熟悉嘅股仔反而有市場。好似隻米蘭站,公司賣點係人人有興趣嘅名牌手袋,仲有名人明星捧場,集資額唔大,但投資銀行老友話反應都唔錯。

有基金經理擔心米蘭站話大力發展內地業務,但國內冒牌猖獗,做二手名牌生意,好容易收到假貨,呢方面風險都唔細。不過,公司話職員辨別假貨能力好高,過去三年米蘭站因為收到假貨而要作出嘅撥備細到你唔信,只係兩萬銀。

米蘭站老細姚君達(右二)話唔怕假名牌,最怕冒牌米蘭站。

反之,原來公司最擔心嘅冒牌風險,就係自己個米蘭站品牌畀人假冒,好似喺深圳行街,竟然會出現冒牌嘅米蘭站店舖;唔單止咁,網上竟然有假冒嘅米蘭站網址,需要集團喺官方網站作出澄清。

講開米蘭站,公司創辦人姚君達因為跟娛樂圈中人相熟,所以十年前開始搞二手名牌店,依家公司已經好有名氣,仲不斷贊助電影或電視節目。明眼人可能會睇到,「米蘭站」嘅店舖經常會出現喺TVB嘅劇集,主要因為公司經常向劇集演員贊助手袋,咁TVB都十分識做,將米蘭站嘅嘜頭不經意喺劇集中播出,令大家起互助互利嘅宣傳效果。

米蘭站知名度高,市場估計新股反應會幾理想。