澳門地標除咗有大三巴，相信就係五光十色嘅娛樂場所。稱得上「亞洲拉斯維加斯」，因為有唔少國際級娛樂場都喺呢度大展拳腳，提供一流嘅表演場地。而我呢個做咗三年幾嘅金牌飯局，亦都首次衝出香港，嚟到新葡京，試吓獲得米芝蓮一星評級嘅8餐廳。今晚我就搵埋澳門地膽小肥、方力申（小方）、蘇永康（阿康）同埋Joey Tang，一齊傾吓佢哋對澳門嘅感覺。

飯局金句：以小見大。

5
新葡京落成咗咁耐，一路都未有機會見識，今晚嚟到8餐廳，真係大開眼界！今次我就搵埋小方、小肥、蘇永康同Joey Tang嚟呢度食好嘢！	小方同阿康經常嚟澳門出席活動，佢哋都話澳門嘅歌迷一樣咁熱情同親切。

金雕玉砌

我用金雕玉砌嚟形容新葡京呢間8餐廳，其實十分貼題，因為整間餐廳的確係同金錢、玉石大有關係。餐廳名攞咗「發」嘅諧音，寓意財源滾滾來，貴賓房更以金色為主調，有仿古銅錢做裝飾。此外，呢度亦以「8」字概念貫穿整間餐廳，例如用真玉砌出一幅幅的吊飾，用銅圈砌出8字圖案嘅簾幕。最令我歎為觀止嘅就係大廳內一條條栩栩如生嘅金魚圖畫，原來每條都係由人手刺繡，絲線透過燈光嘅反射，令金魚更加活靈活現。設計師選擇用金魚為圖案，目的係想為餐廳增添活力。

究竟呢間咁有格調嘅中菜廳係出自邊位大師手筆呢？原來係著名設計師陳幼堅先生。阿康就話，「嘩，唔怪得啦！雖然我未開始食，但係呢度嘅環境已經滿足咗我嘅視覺享受。」平時啲酒樓都係燈火通明，但係呢度就話畀大家知，食中餐都可以好有情調。新開張無耐，澳門地膽小肥已經同家人嚟過飲茶，「呢度嘅點心都做得唔錯呀，我好鍾意門口嗰條隧道，有啲動畫金魚游來游去，好有生氣。」

呢個時候，侍應送上和牛西洋菜，第一道菜已經一鳴驚人！師傅將A5和牛切得很薄，然後捲着西洋菜，牛肉好嫩滑，西洋菜因為軟硬度啱啱好，所以入口時有種極鬆化嘅口感。唔使五分鐘，我哋就將佢清晒，之後大家都話唔夠喉，所以我哋就再encore，仲足足encore咗三次。

multimedia1

衣錦還鄉

你睇，呢條金魚係咪好似真嘅一樣呢？全人手刺繡而成，啲手工真係好精細。	8餐廳地方寬敞，牆身有栩栩如生嘅金魚圖畫，又有真玉做嘅掛飾，真係不惜工本。

每次提起澳門，大家好自然會將焦點放咗喺食同各大娛樂場，但對於小肥同小方嚟講，令佢哋難忘嘅仲有呢度嘅歌迷。「嚟澳門做嘢，啲歌迷知我無時間，就會幫我買手信！」小方說。

澳門鄰近香港，香港藝人都係佢哋追捧嘅對象，亦都因為呢度嘅歌迷比較少機會同偶像接觸，所以每次偶像嚟到澳門，歌迷會好熱情咁到場支持。小方以前差唔多每個月都會嚟澳門做嘢，佢話最欣賞呢度歌迷支持偶像嘅態度，「好記得有一次喺度舉辦咗一次EP簽唱會，有一位澳門歌迷義務幫我聯絡呢度嘅歌迷，叫大家一齊嚟支持我，令我好感動呀。」見到小方喺澳門咁受歡迎，身為經理人當然開心啦！

另一個令我對澳門刮目相看嘅人，梗係小肥啦！當年小肥為小方嘅新歌〈無雙譜〉唱demo，我聽到之後覺得呢個人唱得唔錯，立即約見，之後我就拍板簽咗小肥，佢亦都成為我第一個旗下嘅澳門人。阿康都好欣賞師弟小肥嘅悟性，「佢第一次表演就係同我合作，出場前佢緊張到周身郁，但係我叫佢唔使驚、唔好郁，最後佢喺台上面真係好揮灑自如，我覺得佢好有潛質，領悟力好高。」小肥依家不時都會以「香港藝人」返嚟澳門出show，佢話見到呢度嘅fans咁支持自己，都會有一種衣錦還鄉嘅感覺，「Fans知道我係澳門人，佢哋會好歡迎我返嚟，會同我講『畀心機，加油啊！』，呢啲都成為我嘅推動力。」

唔好怠慢

8餐廳行政總廚鄧聰能先生，原來係香港人，曾經喺日本福臨門工作，最擅長煮廣東菜。今晚佢嘅全部菜式都超水準，我大力推介！

Joey話2010年係太極樂隊25周年，遲啲太極樂隊會推出新專輯，試玩唔同style嘅音樂，各位fans唔好錯過啊！	小方同小肥嘅緣份由〈無雙譜〉demo開始，依家就係好同事兼好朋友。

每次嚟到澳門，我都覺得呢度不斷進步緊，例如顧客服務、環境、設施都有所提升。而身為金牌經理人，我梗係留意呢度嘅娛樂事業發展啦。嗰幾間國際級娛樂場睇準澳門嘅市場定位，將美國嘅經營模式，搬咗嚟呢度。其實以前澳門好少機會同埋大型場地畀藝人演出。依家佢哋就提供咗一流嘅表演場地，令世界各地藝人都嚟到澳門舉辦大show。之前去過好多次美國登台嘅阿康都話，呢度嘅場地絕對可以媲美美國，而小方就話站於觀眾立場，佢幾鍾意依家嘅澳門，「依家好多巨星都會嚟呢度開show，要睇大show可以唔使去咁遠，嚟澳門就得。」身為出品人，我就認為澳門依家嘅變化，就係好機會可以證明畀大家睇，香港藝人都可以有國際級嘅演出，同時亦都提醒香港藝人唔可以忽略澳門市場。

今次澳門之旅，我得到一啲啟發，就係澳門喺食呢方面，已經開始超越香港嘅水準，好似呢間8餐廳單睇排場已經輕易分出勝負，其實呢度嘅大廚鄧師傅都係香港人，可見香港不乏人才，例如嗰道柚子鹽焗手撕雞，師傅就諗到將鹽焗雞配搭柚子，好好食，又好有創意。相反香港就盛行快餐飲食文化，粗製濫造，欠缺特色。我希望藉此警惕香港嘅飲食業唔好怠慢，努力保持我哋嘅競爭力。

8餐廳 地址：澳門葡京路新葡京酒店2樓 電話：（853）2828 3838