為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2011 年 04 月 26 日

公民黨與朱婆婆案幕後關係大拆解

東涌朱婆婆大發神威,入禀挑戰環評報告,法官大人判佢勝訴,搞到港珠澳大橋計劃雞毛鴨血,分分鐘要停工一兩年。呢位婆婆咁厲害,多數人都相信幕後有高人策劃,最大嫌疑係公民黨。但好奇怪,公民黨擰晒頭唔認,話官司係朱婆婆自己搞,態度極之鬼祟。

究竟實情係點?本刊搵到唔少蛛絲馬迹,顯示單嘢同公民黨有密切關係,以下逐一拆解。

朱婆婆居於富東邨東盛樓,係互委會活躍分子,經常參與街坊活動。呢個屋邨乃公民黨區議員林有嫺地頭,過往該黨在東涌搞活動,林有嫺拉隊四圍派傳單,經常都會見到朱婆婆幫手。

據線人講,三年之前,港珠澳大橋進入具體設計階段,走線初定經過大嶼山,公民黨內部開會時,梁家傑、黎廣德及陳家洛都認為單嘢可以大搞,而有關地區發動工作,就直接交由林有嫺負責跟進。

公民黨內部三年前就決定針對港珠澳大橋計劃大搞,主力是黎廣德(中),林有嫺負責地區發動。代表朱婆婆的律師郭榮鏗(右)及黃鶴鳴(右圖)都是公民黨執委。

計劃其中一個方案,是在機場東北填海一百五十公頃,讓入境旅客轉車,接駁屯門連接路,呢個地點接近東涌,公民黨內部認為係最好嘅攻擊點,剛好林有嫺又正在該區開拓地盤,可趁機發大嚟搞,藉此建立勢力。

黨核心亦覺得呢個環保議題可以做大,特別係陳家洛剛上位,欲抓住幾個大issue鞏固自己地位,於是在內部會議數度提及港珠澳大橋將引起交通及環境問題爭議,絕對有發動空間。

由於港珠澳大橋牽涉複雜工程問題,陳家洛搵埋副主席黎廣德拍住一齊搞,佢係土木工程師,過往在黨內主打基建及發展議題,可在業界和環保團體拉到專家幫拖。黎廣德接到此任務,決定集中針對空氣質素問題,找來環保團體做評估,早於○九年九月就直指環評報告有漏洞,大橋建成後污染會超標。

到二○一○年初,林有嫺地頭內一名六十六歲婆婆朱綺華入禀,要求對港珠澳大橋的環評報告進行司法覆核,時間好配合,其中列舉七大申訴重點,涉及極專業數據,與環保團體之前向黎提出的資料亦不謀而合。

朱婆婆目不識丁,領取綜援過活,從冇參與過大橋環境諮詢活動,令人懷疑某方面借佢身份申請法援打呢場官司(如冇法援,訟費要成二百萬)。

幫朱婆婆打官司嘅律師團,亦非一般腳色,而係公民黨嘅核心成員及好友。代表律師之一黃鶴鳴,最近剛晉身公民黨執委,亦係該黨在九龍東嘅主要樁腳(此區乃梁家傑地盤)。負責出庭嘅資深大狀戴啟思,並非公民黨黨員,但曾經係二十三條關注組嘅核心人物之一。在官司中協助戴啟思嘅大狀郭榮鏗,亦係公民黨執委。話單官司同公民黨無關,好難令人相信。

雖然公民黨嘅影子若隱若現,但黎廣德仍然矢口否認公民黨係幕後搞手,表現閃閃縮縮,點解會咁,令人十分疑惑。

政圈中人分析,中產選民近期對公民黨嘅民粹激進路線愈嚟愈唔認同,認為阻撓基建不利經濟,等於打爛中產飯碗。可能公民黨睇到中產選民開始反感,故與朱婆婆劃清界線。

朱婆婆(紅圈)居住的富東邨,是公民黨區議員林有嫺地頭,該黨搞地區活動,都會搵朱婆婆幫手。