商界被賣豬仔 怒斥張建宗「縮骨」
最低工資下月殺埋身，中小企睇住大浪湧到，個個心慌慌、眼光光，擔心撐唔住沒頂。商界最㷫係勞福局長張建宗「縮骨」，唔肯講明休息日同飯鐘唔計最低工資，反而叫老闆善待員工，要商界做醜人，咁搞落去，官商之間信任將盡失！
某商界代表人物同小弟講，當初大家討論最低時薪二十八元之時，商界跟政府有understanding，就係休息日同飯鐘唔計在內，最低月薪大概加到六千幾，商界雖然知道好難啃，但都接受咗。如今法例通過，工會跳出嚟話僱主唔計休息日及飯鐘係「無良」，實行大石壓死蟹，但張建宗只叫僱主跟過往合約做，冇澄清有上述共識，態度含含糊糊，將壓力卸咗畀商界，令佢哋覺得被賣豬仔！
佢愈講愈㷫：「張建宗縮骨唔係第一次，上次交通津貼單嘢，佢以為冧掂泛民就掂，冇同建制派商量，後來對方玩嘢，最後都要建制派幫拖；今次佢唔想得罪工會，迫商界硬食，以後我哋點信佢呀！」經此一鋪，商界對《競爭法》勢必企硬，唔會再聽官員o氹，無謂再被賣豬仔。
