變奏重生

黃昏六點半，闊太R約了中女A到我的工作室，說要召開「緊急會議」。

原來闊太R的老爺奶奶，下個月會舉辦一個鑽婚紀念 Party。R出席過無數大小晚宴，每次裝扮皆貼題搶眼，從未失手，但這次卻難倒她了。

因為她的奶奶講到明，好希望在鑽婚紀念Party 上，可以看到五位媳婦都戴上她所贈的翡翠旦面戒指。而最大問題是，這隻我會歸納為「太婆」級別款式的戒指，襯在任何人、任何晚裝上，都很易會構成時裝大車禍。
戴，會成為時裝車禍，不戴，又會得罪奶奶，R面對人生兩難，只好召開這個會議。

「你哋話我可以點呀？」她無助地望着我和中女A，搲到頭髮都亂了。

中女A對時裝較有心得，從R手機的相片中，已看出晚裝出自名師之手。

在古舊款式的翡翠上，換上新穎的設計，可令人眼前一亮。

「呢條貼身長裙，可凸顯你嘅高佻身材。綠同白二色嘅選用，低調得嚟高貴，又唔會喧賓奪主。Good Choice！」她盛讚R的穿衣品味。

即使聽到A的稱讚，R卻沒有因此而高興，「唉！要戴隻咁嘅戒指，套衫幾靚都冇用啦。」她心灰意冷的說。

接着到我實物辨析那隻「太婆」級款的翡翠戒指了。翡翠旦面大小約有20mm，玉質純、顏色正，形態圓渾飽滿，撇除款式不說，絕對是拍賣級數。

如此高級數的翡翠，鑲在一個接近40年前的老套款式上，真叫人扼腕嘆息！我沉思一會後，決心要改寫她的命運，便向R主張：「改款再鑲吧！」

「改款即係要先拆粒翡翠出嚟？但我知有啲寶石一拆就爛⋯⋯咁點改到款呢？」她嘆着氣說，看來她也有想過這個方法。

一向自負自信的R，此刻如受傷的小貓，徬徨無助的瑟縮在梳化一角。

「翡翠比其他寶石的好處是韌性好、硬度高，拆除過程中會損爛的風險比較低。」我先安撫徬徨的她。其實若然翡翠本身內外都沒有裂痕，即使拆出來，再重新鑲嵌，都不會有問題。
這番說話有如她的救命繩，把她從絕望的深淵拉回來。她的雙眼霎時回復神彩，坐直身子， 即刻吩咐我和中女A：「仲等咩？快啲諗吓有咩新款襯我啦，得返一個月時間咋！」

我和中女A心領神會對視一眼，知道我們的霸氣R 回來了。

時裝有潮流趨勢，翡翠首飾亦一樣。不過衣服out了就要丟，首飾過時卻可以re-design重生。

正因如此，我從來買翡翠多過買衫。