為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 玉裡心經 2022 年 12 月 27 日

Serena Yau

愛笑,愛靚,愛翡翠。父親從事玉石批發生意超過四十年,自小玩玉多過玩Barbie。1999年取得G.I.A.寶石鑑證資格,在見盡各類寶石後,更加鍾情玉的獨特個性。2004年開設工作室,全情投入奇妙深玄的玉石世界。

碎碎平安

靚太C請我落Landmark high tea ,說有事要我幫忙。 從遠處已見她坐在廂位,悠閑地望着廣場中庭的噴水池。一把長髮隨意盤在頭上,展露出精緻的臉龐。
直至我站在她跟前,她才發現我到了。在點餐之後,我問有甚麼事可以幫她?

她隨即拿出一隻紅色絨布袋,裏面是一隻已斷成四段的玉鈪。這隻玉鈪質色一流,爛了大為可惜。

「隻玉鈪係我奶奶個金蘭姊妹嘅。早幾日佢喺屋企撞到張雲石枱,隻鈪就爛成咁樣咯!」她帶點惋惜的說。

因為我曾經為她的奶奶維修過一件玉吊墜,她順理成章再請我幫忙。

我檢查過後,將玉鈪放回絨布袋,自信滿滿的說:「冇問題,我諗吓點樣整番靚。」

她聽到我說可以幫忙,即眯着笑眼,做出拍掌動作,可愛漫爛宛如少女。

爛了的玉經過重新打磨和鑲嵌,可以變成另一個新款。

 


然後她優雅地換了坐姿,回復正經,飲啖鮮榨甘筍汁後問我:「我聽人講啲玉爛咗會帶嚟衰運,要丟咗佢唔好 Keep,係咪真o架?」

我把視線從名店D的櫥窗轉回到她身上,說:「我們行內沒有這回事啊!好似呢隻咁高質素嘅玉鈪,維修番依然有價值,點會咁儍丟咗佢?」

其實任何要經年累月才形成的天然寶石,必然會蒙上一些神秘色彩,玉當然不會例外。

她微微點頭,眉頭輕皺的說:「咁又係,呢種事情『信則有,不信則無』。」

此時美饌上桌,我們一邊細嚐一邊再聊。我最愛這裏的龍蝦扁意粉,新鮮龍蝦肉嫩爽彈,軟硬適中的扁意粉上,掛上香濃不膩的醬汁,由賣相到味道從未讓我失望。

我忍不了先吃一口,再說:「從實際情況去睇,一件玉爛咗,或者崩咗,缺口都比較鋒利,有機會弄傷自己,所以修補前真係唔應該配戴。」

嘴裏的美食令我再無暇說話,我輕閉雙眼,盡情享受龍蝦和意粉在口腔中展開的連場妙舞。

一頓飽餐後,我們點了杯Earl Grey來平復舌上的餘韻。

靚太C抿了一口茶,突然有感而發說:「其實心愛嘅嘢爛咗,心情一定受影響,樣樣睇唔順眼,自然以為自己行衰運,都可以話係一種心理作用。

「有幾多人可以好似你心理質素咁好,個包包刮咗咁大條痕,仲可以食得咁滋味?我就做唔到嘞。」她真誠的稱許我。

我又確實是個凡事豁達的人,她的稱讚,我當之無愧⋯⋯ What?我的H包包刮花咗!!!