為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 玉裡心經 2022 年 11 月 29 日

Serena Yau

愛笑,愛靚,愛翡翠。父親從事玉石批發生意超過四十年,自小玩玉多過玩Barbie。1999年取得G.I.A.寶石鑑證資格,在見盡各類寶石後,更加鍾情玉的獨特個性。2004年開設工作室,全情投入奇妙深玄的玉石世界。

玉扣定驚

約了中女A先在蘭桂坊Happy Hour,晚上再一起出席電影首映禮。
「細路仔成日瞓覺驚醒,係咪食保嬰丹好呀?」我正在喝Negroni ,單身的她失驚無神這樣問,唔通……
她知我在「腦補」情節,連忙解釋:「我講緊我家姐個女呀!」為免我胡思亂想,她一口氣告訴我事件的始末。
原來她家姐的三歲女兒,近排瞓覺頻頻驚醒。看過醫生,說可能是小朋友精神緊張所致。
「好似話保嬰丹對夜睡不寧有效,咪睇吓你識唔識囉。」語畢,她側一側頭。
我思索了一會,向她建議:「呢啲情況,可以戴件玉喎。」
「你意思係用扮靚嚟氹佢開心,令佢精神冇咁緊張?」她竟然從心理層面分析我的提議!
我無奈要對長期讀「番書」的她,解釋玉在民間的傳說習俗。「好多人都相信玉有安神定心嘅作用,遇上細路仔瞓覺驚醒,都會俾個『玉耳扣』佢戴,用嚟壓驚。」

玉耳扣除了定驚,還有平安圓滿的意思。

 


「耳扣?B女咁細個,無打耳窿喎⋯⋯」她搔一搔頭答。
我於是直接上Google, search 圖片給她看:「『耳扣』係咁嘅!」
「哦!圓形中間有個窿呢一種,原來叫耳扣。」她望住張圖,恍然大悟。
我續說:「中國傳統上,細路仔戴住佢,會瞓得安心,冇咁易驚醒。」
我話未說完,她已馬上撳手機上網找資料。看着她修長的手指不停移動,啞黑和金色相配的美甲吸引了我的目光。
在我看得入神之際,聽見她呢喃讀出網上的資料:「⋯⋯科學證明,玉含有對人體健康有幫助嘅『微量元素』,例如硒、鋅⋯⋯」「⋯⋯長期戴玉可舒緩鬱悶、寧心安神。照咁講,壓驚唔係完全冇科學根據喎。」她全神貫注地分析,口中唸唸有詞。
我知中女A素來理性,但估不到連壓驚,她都要找科學來back up。
數個星期之後,跟她食Dinner,她甫坐下便說:「阿B女戴咗你送嗰件玉耳扣之後,瞓覺真係冇再驚醒嘞!我見網上寫,玉仲可以擋煞、保平安⋯⋯」
「小姐,你查咗有科學根據未?」我刻意戲謔反問她。
她卻沒我好氣,繼續自顧自發表「偉論」:「玉嘅傳說習俗,又唔係樣樣都需要用科學去證明佢『work』 嘅。就好似⋯⋯」
她說話時,雙手不時比劃,我留意到她這次新造了以湖水藍來撞shocking pink的美甲。????!比上一次更吸引喎!
此刻,貪靚的我,比起聽她的見解,更有興趣知間Nail Salon到底在哪裡。嘻嘻。