中電全方位減碳

今年國際能源價格飆升，民生大受影響，BBC和情報顧問蜻蜓分析，由一月至九月期間，全球超過九十個國家地區曾因能源問題而爆發過示威抗議，其中部分地方過去極少見到示威發生，可見能源問題已經升級至政治危機。到底各地能源價格升咗幾多？
由二○二一年一月至二○二二年九月底，原油價格升咗六成五，同期主要城市電價亦紛紛上漲，新加坡升四成五，東京升四成四，柏林升四成八。倫敦電價更翻倍上升百分之一百零二，因此英政府要將家庭能源費用凍結至每年二千五百英鎊上限，並暫時撤銷平均每年一百五十英鎊嘅相關環保稅。有媒體估計，假如不設上限，到下年春季倫敦一般家庭能源費用會升到逾四千三百英鎊。有居於英國嘅華人講笑話唔會再煲老火湯，甚至拆咗部分燈膽以減少耗電。

減碳要全民投入至能成功，中電用戶用電量按年減少可以儲分換禮品，有更大誘因慳電。

事實上，面對幾十年來最嚴峻嘅能源危機，各國推出不同嘅應對措施。德國計劃向能源企業提供貸款擔保，並推行「八千萬人齊節能」運動，甚至古蹟景點夜晚都唔再打燈。法國就實行「能源清醒」政策，包括商店開冷氣一定要關門，否則要罰款。歐盟二十七國為應付寒冬，大量入口電暖氈，以減少使用耗電量高嘅暖爐。日本更計劃重啟閒置嘅核反應堆，及考慮投資新核電站；新加坡則派發公用事業費用補貼。
至於香港，同期電價升幅百分之十五點二；而單計今年一至十一月，中電每度電價累計升百分之十二點六，港燈則加百分之三十八點一。就中電電價，今年累計加幅比較好多地方溫和，原因之一係輸入核電價格較為穩定，而核電約佔中電喺香港供電量三分之一。今年頭八個月核電成本維持喺五十五港仙左右，同時間天然氣成本已經升到高過核電成本五成，煤更加升至核電成本兩倍。以一個家庭每月用二百七十五度電計算，中電電費約三百七十六元（港元，下同），倫敦折合約一千元（截稿前匯率計算）。
燃料價格攀升之下相信明年香港難以避免加電費，不過中電估計加幅唔會達好高雙位數，因為部分燃料供應屬長約，可以減輕近期燃料價格波動影響。而根據二○一八至二○三三年《管制計劃協議》，兩電准許回報率由上一份協議嘅百分之九點九九下調至百分之八；協議亦規範兩電營運表現，及要加大力度實踐和推廣節能。
香港目標二○五○年達至碳中和，電力公司係重要推手。中電已經喺新界西堆填區設轉廢為能發電機組「中電綠源」，上年供應三千八百萬度潔淨能源。公司承諾未來會接駁更多可再生能源項目，以及擬於東南水域興建風力發電場。另外亦會探討最新科技，提升燃氣發電設施，及支持零碳氫能發電。
減碳要全民投入至能成功。中電用戶用電量按年減少可以儲分換禮品，有更大誘因慳電。今年七月中電舉行兩次「慳電任務」，每慳一度電就有二百積分，結果四個鐘嘅任務市民共慳三十萬度電，證明節能意識好強。