不老之謎

約了世姪女在中環晚飯，慶祝她二十歲生日。見時間未到，一於先去名店J閒逛。
於試高跟鞋途中，她行開接了通電話，回來就有點「嬲爆爆」說：「我咁嘅年紀，點戴玉鈪啫！」
細問之下，原來她那位正在讀時裝設計的男朋友，有篇「旗袍系列」的功課，找她幫忙做model拍硬照。
「影相冇問題。」世姪女五官標緻，樣子甜美，自然有自信。「但要戴住隻玉鈪喎，唔顯『老』廿歲就出奇啦！」她邊說邊對着鏡子，撥順被怒氣昏亂了的頭髮。
我放下手上的Jimmy Choo金色高踭鞋，安撫她說：「戴玉鈪唔一定老嘅。」
世姪女半信半疑，於手機找了幾張玉鈪照給我看。「Auntie Serena，啲玉鈪咁樣o架喎！」
「只係呢啲款『老』啫，戴『後生』款咪得囉！」我看過照片後說。
聽到玉鈪有「後生」款，世姪女一臉疑惑。

後生女都可以戴玉鈪，只看你懂不懂選擇款式。

「玉鈪常見有三款。」我向她略作介紹：「相入面嗰種，外卜內平的，叫『福鈪』。
「另外有種『圓條鈪』，係內外皆圓，好似個環咁嘅。
「仲有一種外面卜、裏面又卜嘅，就叫『貴妃鈪』。
「呢三款仲有分闊身同窄身。」我續說。
「即係高踭鞋都有粗踭同幼踭之分。」她似懂非懂地搶着答。
我索性借「鞋」發揮，繼續向她解釋：「幼帶斗零踭、圓頭厚踭、蛇皮扣帶金屬踭、仲有露趾尖頭等等，每個款式都予人唔同嘅觀感。」
之後，我順勢請店員拿一對當季最新款給我試穿，接着說：「着上顯得老，只因為你揀錯款，而非因為着咗高踭鞋就會變老。玉鈪亦如是！」
她笑眯眯點着兩隻食指，以可愛的語調試探我：「咁如果我戴玉鈪，應該揀咩款先啱呢？」
她這一問，幫男友之心昭然若揭！
「『貴妃鈪』較適合後生女。要選幼身，顏色淡冇所謂，但玉質要油潤。」我憑經驗去告訴她。
她即時將整個頭枕落我膊頭，嬌聲嗲氣地說：「Auntie Serena， 你係『玉女』，一定有呢啲款嘅玉鈪啦！」
聽到「玉女」二字，我即時哭笑不得。給她一哄，我又怎忍心不幫她呢？
兩星期後，世姪女約我去IFC食lunch，說要給我看相集。相中的她，穿上鳳仙領無袖淡藍色旗袍，手腕戴着我為她精選的玉鈪，斯文淡雅之餘又不失活潑靈動，全無一點「老」氣。
「Auntie Serena，下次你啲玉要請Model示範，我隨傳隨到！」她滿心歡喜地向我自薦。
「你最叻賣口乖！」我白她一眼：「你唔係話戴玉會老廿歲咩？」
她搖一搖還戴在手腕上的玉鈪，狡黠的笑着說:「只要揀啱款去戴，變後生廿歲就真！」
人靚口又甜，我面前杯Cappuccino，還需要落糖嗎？