質的疑惑

「我呢件翡翠成件都咁『綠』，咁樣都唔係靚貨咩？」靚女朋友A揈住件翡翠吊墜，一臉不解，語帶委屈的問我。

「小姐，『綠』唔係大晒，你件翡翠的『質地』唔好啊！」我呷着咖啡從容地說。

她清秀的眉頭一皺：「咩『質地』呀？」

「質地係翡翠的靈魂。外行人揀翡翠總是忽略這個重點。」我繼續耐心解釋。

「你話我件翡翠『質』唔好，咁點先算係好啫？」她續問。那雙烏溜溜的大眼睛裏，閃耀着濃濃的求知慾。

正與她在四季酒店high tea的我，決定利用面前兩杯蒸餾水來作個比喻。

「一件質地『好』的翡翠，就似杯蒸餾水咁純、咁乾淨。」

「質地」純淨的翡翠，更勝有「色」無質。

然後，我在另一杯水中，製造特別效果。先加一湯匙咖啡，溝兩羹，再「唧」少少hand cream，跟住攪勻。「嗱！差嘅翡翠種質，咪似呢杯嘢咁渾濁囉！」我指住杯「特效水」說。

翡翠「質地」的清濁分野，是可以有如此鮮明的對比。

「試幻想加埋綠色顏料入去呢兩杯水度，顏色係變綠了，但『清』同『濁』依然一樣，因為『質』冇改變。」

我見她在loading……半晌，終load出一個問題，嘟起嘴問：「咁……點解有啲質會『清』，有啲會『濁』呢？」

「咁係關乎到翡翠形成嗰陣嘅遭遇嘞。」這是個「地質學」話題，我暫時仍未遇過有人感興趣。

卻見她將椅子挪近我，這是對話題有興趣的「微動作」喎！

在酒店café正播放蕭邦的《夜曲》之襯托下，我開始向她娓娓道來翡翠可歌可泣的命運。

「喺地底漫長嘅形成過程中，有很多因素會改變翡翠嘅『質地』。例如『密點分佈』、『結晶形態』、『礦物雜質多寡』⋯⋯」

話口未完，她已連打了幾個絕情的呵欠，我惟有盡快將話題作結：「結論係，成億年仲Keep到個『質』咁純淨，係極度罕有嘅。」

只見她用手支着下巴，若有所思。 我趁機嚐一口侍應剛送上枱的。

在我正享受的蛋香時，她以睿智且冷靜的聲調說：「因為『質地』純的翡翠好少，所以要純淨嘅，先可以叫做靚，而唔係用『色』去衡量，啱唔啱？」

我驚訝她可能是個學翡翠的「奇材」，竟然一聽就捉到重點！

「啱晒！行家睇翡翠，永遠以『質』為第一，『質地』唔好，幾『綠』都冇用！」我再次強調。

我說話剛罷，她隨即鬼馬地說：「咦！咁同揀男友一樣啫，唔好淨係貪靚仔（色）。冇內涵（質）嘅，幾靚仔都冇用！」

她將揀男友的準則，套落去揀「翡翠」中，精準易明，簡直是神級比喻，真忍不住要讚她「才色兼備」。

她聽後心花怒放，呢餐Tea點都唔畀我埋單。