我笑他人看不穿
不少人很怕跟林敏驄相處，他狀似玩世不恭，不按牌理出牌，答非所問，常以無厘頭的答案，避開不想剖白的問題。
記者問他有否掛念自細由陳伶俐湊大的兩個兒子，他會說：「有時啦！但我掛住啲女多啲喎！」
以前拍過不少MV，他愛以妙齡性感鬼妹仔穿插畫面，「嗰啲好普通啫，環球小姐之嘛，有啲來自立陶宛，喺金牛苑隔籬。」
2009年有指他患上驚恐症，他四両撥千斤化解傳聞：「我有身份證，亦患瘋狗症，遇見靚女時就可能有驚恐。」
當年獲提名香港電影金像獎最佳男配角，他點評其他候選人：「全部都唔係我對手，因為我自己對手喺呢度。」語畢望向攤開的一雙手，鬼馬地笑。
提到是不是曾志偉親自邀請他拍《下流上車族》，他似是而非答：「佢擺低兩個麻包袋嘅錢喺我門口。」
行徑吊兒郎當，雲遊人間，林敏驄這個鬼才，其實外冷內熱，有一顆童真愛玩的心。
早前他上曾志偉的《獎門人》節目，失驚無神拿起玩具喇叭，在志偉的耳邊，大力按響了一下，令他收起笑容，揞住耳仔走到一旁休息。
林敏驄見狀，即如犯了錯的小孩，走到志偉身邊耍冧，把頭靠在他的肩膊上撒嬌，試問又點嬲得落啊！
《下流上車族》演技大爆發，被視為今屆視帝大熱門。
幾年前，我和王馨平合作推出《心經》單曲CD，作全港免費派發。致電當年負責作曲的林敏驄索取版權時，他用一貫無厘頭口脗，開出一個條件：「只要你擘大口唱就可以了，版權方面完全沒有問題。」
他作曲的《心經》，當年譚詠麟、王菲、梅艷芳、劉德華、張學友、黎明、郭富城等巨星都唱過，對弘揚佛法是一大貢獻。
一提到觀世音菩薩，他便一本正經。「可能我前世係和尚，所以對佛學似曾相識，呢件事係我呢世人唯一做嘅一件好事，咪容許我喺下半世可以作奸犯科、偷呃拐騙囉！哈哈！」
林敏驄看似口賤，其實人叻心善，我不禁幻想到他會這樣回話：「有D拱嘅樹？」
林敏驄絕對是鬼才，可以寫出《深愛著你》的浪漫歌詞，又可以惡搞「酒杯敲你個頭，你阿媽話痛。」抵佢認叻。
