「打波先嚟落雨，唔通連個天都唔鍾意我？」
24年前，只有14歲鄭仲軒（Eric），在社署宣傳廣告中，和朋友到球場踢波時遇上了風雨，波踢不成，更一度懷疑人生，而說出這句經典對白。
廣告近日再被翻叮，原因是片段中身形細小，看似潺仔的他，經年累月狂操，已變成視覺震撼的爆肌筋肉人。
這天訪問，Eric坦言成長路上也遇到不少雨天，早年曾從事多個行業，但份份工也做不長，直至任職健身教練後，才找到人生方向。「過去幾年，我不斷參加健美比賽，直到兩年前終於獲得職業賽資格，未來可以衝出香港參加國際賽。」
去年，他更和一班志同道合的好友，合資在中環開設健身室，既做老闆，又可隨時操練，他笑說：「喺度做Gym，外面幾大雨都唔使怕！」
所以說，希望在明天吖嘛！

 

 

Eric多年來曾在不同的健美比賽奪獎，其健身室接待處上方設有層架，擺放不少他獲頒的獎牌和獎座。

四眼仔變大隻佬

鄭仲軒由四眼仔變大隻佬的對比照，近日在網上瘋傳，令其人氣一度爆升，Eric笑言並不驚訝，「其實耐不耐都被人攞番出來講，都習慣晒！當年我只有14歲，阿媽知我鍾意踢波，有日問我：『想唔想賺錢買遊戲機？』然後話去踢吓波就買到。去到球場，發現原來係拍廣告，之後阿媽代收酬勞，買咗部Play Staion俾我。」
少年時代的他，跟廣告中一樣，瘦蜢蜢，跟大隻完全扯不上關係，「由細到大都想自己大隻和健碩些。到18歲左右，便開始join一些健身會籍，做咗一兩年，開始見到線條。」
Eric稱初期健身只是玩票性質，直至十年前當上健身教練，才逐漸沉迷健身，繼而接觸健美運動。「健美和健身唔同，健身如跑步、遊水、舉鐵，人人都做到，但健美要求高很多，除了肉量脂肪要夠低，又講究肌肉分離度、對不對稱，比例又要靚，甫士要擺得好，加埋好多變數。」
這些年來，Eric用心鑽研健美，自一六年起開始參加健美比賽，先後贏得「2016 HKBPSF Man Sport Model男子健體冠軍」和「奧林匹克業餘賽事香港站男子健體冠軍」。到2020年再取得「Global Classic IFBB PRO 健美職業資格賽全場總冠軍」，成為香港首位classic組別的職業運動員。

 

十四歲的Eric在廣告片中細細粒且瘦蜢蜢，很難想像二十四年後的今天變成大隻佬。

女友Phoebe年前參加健美比賽，擔任評判的Eric親往後台打氣，「賽前我申報了我們的關係，所以到她參加的那一場賽事，我需要避席不能參與評分。」

Eric在健身界薄有名氣，一八年曾是呂良偉和其兒子呂善揚的私人健身教練。