專家樓言

行政長官李家超上月發表任內首份《施政報告》，提到增加土地和房屋供應為重中之重。相關短期措施包括加快審批建築圖則、擴展標準化補地價安排、放寬申請強拍門檻，以及壓縮造地程序，令「生地」變可建屋「熟地」時間縮短約三分之一至一半。其他主要舉措有研究開發綠化地帶、積極填海、聚焦「北部都會區」和發展棕地等，希望長遠為香港覓地建屋。報告一出，我請嚟萊坊董事、大中華區研究及諮詢部主管王兆麒（Martin）到節目，傾傾佢對樓市點睇。
房地產市場對於報告反應冷淡，Martin解釋，除「簡約公屋」嘅倡議之外，大部分政策僅屬舊酒新瓶，對行業而言並不新鮮。最受注目，莫過於政府為「搶人才」，向外籍人士退還買家印花稅及新住宅印花稅。雖然所退還款項相當於樓價三成，但稅款始終要先繳交，待合資格居港七年並成為香港永久性居民後，至可以申請退還。因此Martin擔心，措施未能惠及手頭現金不足買家，對於刺激樓市作用有限。

政府希望將北都打造成第四個商業中心區，鼓勵原區就業， 相信可以帶動當區住房需求。

對於本地人嚟講，報告未有提出加碼支援買樓措施，造成期望落差。更甚者，市場憧憬嘅樓市減辣措施並未成真。今年頭九個月樓價累跌百分之八，但Martin覺得並非斷崖式下挫，故未能提供足夠誘因令政府全面撤辣。佢認為樓市炒風不及以往，額外印花稅（SSD）只會阻礙二手市場流轉，成交不足導致市場欠缺參考價，令每一口價差距過大，引發連鎖效應和惡性循環，加劇樓市跌勢。近年疫情和政經局勢緊張，籠罩全球經濟與投資環境，佢相信政府有條件審視稅項力度。
講到應否撤辣，先前訪問過中原地產集團創辦人及主席施永青，佢認為今年係一個分水嶺，標誌樓市由近二十年嘅大牛市轉勢，走向熊市，原因係環球加息等宏觀因素打擊市場氣氛，使買家卻步。但相較股市，樓市抗跌能力較高，施兄反而覺得係有賴政府推出辣招，趕絕投機分子，令大部分入市者都係真正用家。樓市用家唔似股市炒家般對市況敏感，而剛需彈性較低可支撐樓市。就咁睇嚟，似乎業界對於應否減辣眾說紛紜。
《施政報告》焦點之一，落在「北部都會區」。政府希望將北都打造成第四個商業中心區，鼓勵原區就業，相信可以帶動當區住房需求。被問及港九新界樓價差距，Martin指港九與新界樓價相差最懸殊時，曾多達一倍，現時交通基建配套日漸發達，港九樓價只比新界高四成。《施政報告》提及將有三條主要幹道及三條鐵路陸續上馬，全港運輸網絡應會更為完善，相信可帶旺新界經濟動力，Martin預視樓價差距將進一步收窄至兩成。
由於年尾樓市交投向來淡靜，加上《施政報告》有助阻止樓價跌勢，Martin估計本年度樓市下跌百分之八。預料明年全面通關，有助振興樓市交投，可將跌幅縮減至百分之五以內，屆時亦可望企業回流香港，為辦公室租賃市場打下強心針。