為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 親子天地  > 母心肝 2011 年 03 月 22 日

日本奶粉荒 徐淑敏智叻攻略

日本經歷311大地震後,不但造成傷亡慘重,食水、食物等更面臨短缺,亦令香港掀起一片搶購日本奶粉潮!有港人父母搶得十罐日本奶粉滿心歡喜,也有只尋得兩罐日本奶粉憂心忡忡的父母呆站於超市外。

不過,去年榮升人母的徐淑敏(Suki),卻無半點擔憂,全因她習慣於早上讓女兒(Vianna)進食日本奶粉,晚上則以澳洲奶粉代替,所以即使日本奶粉斷貨,也可以用澳洲奶粉取代,Suki分享心得說:「只要唔係一次過轉奶粉,隔餐轉,對BB腸胃就唔會有影響。」

三月十二日,徐淑敏為慶祝女兒Vianna一歲生日,特地於深灣遊艇會舉行生日派對。

日本發生大地震後,本港出現搶購日本奶粉潮,於售賣奶粉的店舖外,不難見到大批市民排隊輪候購買奶粉的情況。

處變不驚

去年三月榮升人母的Suki,面對日本奶粉荒就處變不驚,由於她習慣早上餵女兒Vianna吃日本奶粉,晚上則飲澳洲奶粉,所以即使日本奶粉斷貨,Vianna也可以用澳洲奶粉代替,「我同老公冇話特登去搶,買到就買,買唔到都冇所謂。我個女之前因為濕疹問題都轉過幾次奶粉,只要唔係一次過轉,隔餐轉就唔會出現肚屙問題。依家囡囡晏晝嗰餐會食粥仔,或者畀多啲水果佢食,因為日本奶粉主要都係幫助嬰兒腸道健康,食多啲水果都有幫助。」

日本發生九級大地震,可能引發史無前例的核災難,本港繼出現日本奶粉荒後,最近更爆發「盲搶鹽」抗輻射,對此Suki慨歎:「有冇搞錯?鹽都搶?日本嗰邊都未搶,香港使乜搶?食咁多鹽對個腎唔好o架,希望啲人唔好咁蠢乜都搶啦!」

上周二(三月十五日)是Suki女兒Vianna一歲的生日,為隆重其事,她與丈夫黃浩特地在三月十二日於深灣遊艇會為愛女舉行生日派對,邀請了一眾親朋戚友出席,Suki說:「囡囡喺屋企人心目中係小公主,但我哋對佢就絕對唔係公主式管教;不過,囡囡本身惡底,會打我;如果佢打我,我一定鬧番佢!」

Suki透露,囡囡真的很像老公前世的情人,看見爸爸錫媽媽,會用小手仔推開媽媽,睡覺時又會用腳踢她,用手攬實爸爸,「雖然Vianna成日呷醋,但每朝早一擘大眼,見到囡囡好似小天使咁瞓喺我哋中間,就感覺很溫暖,佢好似守護緊我哋咁。」

徐淑敏好姊妹沈卓盈抱着契女Vianna高興不已。

藉地震教育孩子

天災無情!日本九級大地震引發海嘯,造成逾萬人死亡傷殘和下落不明,有小孩從新聞中目睹慘況大呼「好驚」,為人父母的應如何藉着今次地震安撫孩子,並且作出適當的教育呢?

以下數位娛樂圈父母的心聲,應可讓讀者們參考細味一番。

三月十一日,日本發生大地震引發海嘯,造成傷亡慘重,家長可藉着天災教導孩子們學習珍惜。

汪詩詩從旁指導

為丈夫甄子丹育有七歲女兒及三歲兒子的汪詩詩,直言女兒看畢新聞後並不相信是事實,「佢以為係拍戲,我就同佢解釋番點解會有咁嘅情況出現,佢知道之後都好驚,又問我咁嗰邊啲人啲衫點算?因為佢仲細呀,佢覺得災民冇晒啲衫好慘,又話想捐啲衫畀佢哋,我有同佢講天災避無可避。不過,都唔會成日掛喺口邊,怕佢會太驚。」

林曉峰解釋天災

育有兩名七歲及六歲兒子的林曉峰,表示有跟兩個兒子一同睇新聞,不過由於他們年紀尚輕,未完全理解天災的實際嚴重性,「佢哋會問點解有地震、海嘯,咁我就好似Discovery Channel咁解釋畀佢哋聽,我一路都有教佢哋要珍惜現在,愛護家人,呢個概念唔係發生咗事先教嘅。」

麥長青懂得感恩

育有十一歲女兒及八歲兒子的麥長青,表示有跟仔女一同看新聞,「畀佢哋知道日本嗰邊啲災民幾慘,我哋喺香港有幾幸福,所以我哋要感恩,愛惜我哋有咁好嘅地方,同時幫到人嘅時候又要盡量幫,並且祝福人哋,可以快啲度過難關。我哋真係要多啲親近屋企人,珍惜相處時光。」

森美灌輸知識

育有八歲兒子及四歲女兒的森美,表示兒子有問他為何有地震及海嘯,「我以前讀書時係讀理科,會藉住今次將理科知識灌輸畀佢哋聽;至於環保意識,我一向都有教佢哋,有時我去洗手間唔記得熄燈,佢哋都會提醒我。我啱啱去完雲南、貴州探訪,都有攞啲相畀佢哋睇,等佢哋知道當地嘅小朋友生活苦況,希望佢哋知道自己身在福中。」

琦琦珍惜現在

與丈夫任達華擁有六歲女兒任晴佳的琦琦,感覺到天災的無情,「真係好似地動山搖,令人好難過,我同老公陪住個女睇新聞,佢睇到電視上咁震撼嘅畫面都好驚,我就趁機教個女環保啲,學識珍惜,愛惜依家擁有嘅一切,節約用水呀,其實對小朋友嘅教育係每日都要做嘅。」

許紹雄互相教導

育有十四歲女兒的許紹雄,直言女兒思想成熟,看見日本地震的新聞後,深深體會到天災的無情,「佢知道要珍惜身邊人,亦知道環保嘅重要性,有時仲會提我唔好用咁多廁紙添。」

黎耀祥關懷他人

育有十三歲兒子黎正橋的黎耀祥,曾在新西蘭經歷過輕微地震,對於這次日本九級地震,也教導兒子要珍惜現有的幸福,「香港真係好好,我有教個仔要識得珍惜現在擁有嘅幸福,其他地方有自然災害真係好慘,要識得體諒其他人,要關懷其他人。」