為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2009 年 03 月 30 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

谷少甜

香港人有一樣唔少得嘅飯後活動,就係食糖水,到咗夜晚好多糖水舖都座無虛席。今晚我就反傳統,食完糖水先食晚飯!哈哈!飯局之前我去咗谷祖琳(小谷)喺大坑嘅小甜谷,特登為佢破甜戒食甜品。之後,我哋移師去到天后嘅留家廚房,同谷德昭(肥谷)、留家廚房老闆劉健威一齊傾吓食經、電影經,仲同小谷分享吓做生意嘅經驗!原來開私房菜、做導演同埋開糖水舖,可以如出一轍。

飯局金句:只要記住你想成功,就會成功!

6

其實做老闆就好似做導演,指揮員工演出你手中嘅劇本。今晚飯局,新丁老闆娘小谷,就向肥谷、留家廚房老闆劉健威,請教營商之道。

糖水星巴克 小甜谷

multimedia1

雖然我唔食甜嘢,但係大家唔好以為我淨係拎住嚟影相,我真係有親身試食!我個人推介北海道特濃牛乳蛋白,同埋杧果糯米糍。

北海道特濃牛乳蛋白($23)、芝麻合桃露($18)、溏心蛋腐竹白果薏米糖水($16)、杧果糯米糍($18)、荔枝奶凍($25),小谷堅持用靚料同花時間去製作各款糖水,成本高但價錢就好大眾化,絕對抵食啦!

甜姐兒

夜晚7點,我嚟到位於大坑書館街嘅小甜谷,呢度環境清幽,附近有唔少Studio、Designer House,肥谷話夜晚會有唔少型人,或者靚女模特兒落嚟食糖水,「呢度係繼SOHO之後,好有濃厚食嘢氣氛嘅地方,呢度靜中帶旺,又有啲studio進駐,令成個氣氛變得型咗。」

身為老闆娘嘅小谷,吩咐店員準備咗幾款招牌甜品畀我試吓,未食之前我同小谷道明來意,「好多人都知道我其實係唔食甜嘢嘅,但係今晚我為咗你破戒,因為我覺得你開咗間咁有個性嘅糖水舖,係好值得支持。」

小谷特別推介北海道牛乳蛋白畀我,佢用咗北海道牛奶嚟燉,貪佢奶味好濃,有after taste!試咗幾款,我覺得杧果糯米糍都做得唔錯,因為做得好煙韌。之後,小谷就解釋小甜谷店名嘅由來,「其實決定店名之前,都有幾個ideas,有人提議用肥谷喺《食神》入面『糖牛』個名,又或者『甜姐兒』等等。」肥谷就話,「但係大家都覺得『甜姐兒』呢個名,同小谷本身個人有啲出入,所以最後落選,哈哈。」最後,就用咗「小谷」同「甜品」兩個元素,起咗小甜谷個名。肥谷補充,「少甜呢種飲食態度興咗好耐,所以我哋未來都會研究一啲少甜嘅糖水,令一啲唔係太食甜嘅人都食到,同時又可以fit到間舖個名。」我諗各位女士聽到有「少甜糖水」一定會好開心,因為食完糖水之後,滋潤之餘又唔驚會肥,呢個諗頭的確唔錯。

糖水星巴克

小谷同肥谷兩叔姪合作搞糖水舖,但從來未喺電影上合作過。肥谷話:「遲啲開新戲會搵佢㗎喇。」小谷話好期待同阿叔合作。

小谷話佢係演員底,所以佢好鍾意同人溝通,經常問吓食客對小甜谷嘅意見。

食完糖水,我哋就移師到天后嘅留家廚房繼續傾。由專欄作家劉健威先生所開嘅留家廚房,置身於天后嘅食街——清風街,餐廳地下提供不同款式中菜,二樓則提供私房菜。留家廚房更獲得2008年港澳版《米芝蓮》推介為物有所值嘅食肆。劉生喜歡食,對飲食文化更有一種堅持,就係奉行「原教旨主義」,即係選用最基本地道嘅食材,煮出最傳統菜式。好似嗰道番禺魚鬆炒米,本來已經失傳,但劉生專登搵番舊食譜,令呢味菜重現。

劉生經營食肆有豐富經驗,小谷當然唔放過向佢請教嘅機會,「起初以為開糖水舖就係將糖水煮好,然後畀客人咁簡單,但係入咗行先知原來好複雜,尤其是管理員工!」劉生就話,「無錯啊,你依家入咗一個好複雜嘅行業,而廚房大佬係最難應付嘅,我試過有個大廚每個月都話要辭工,之後我要同佢『談情』,同佢傾多啲,開解吓佢。」身為老闆,當然要留住好員工,但係建立一個完善制度就更加重要,因為老闆可以隨時搵人填補工作崗位。

劉生對食有要求,小谷對佢嘅糖水舖亦都有抱負,「有一日,我同肥谷傾開,點解香港無屬於香港嘅糖水品牌,好似Starbucks咁呢?於是我哋從呢個方向出發,決定做最基本嘅中式糖水,同時以店面設計、擺設打造店舖嘅個性。」小甜谷嘅裝修、枱椅、碗碟都散發着一種簡約、悠閒嘅感覺,相信假以時日就會成為「糖水Starbucks」。

想食啲咩?

小谷啱啱創業遇上唔少困難,但係我同佢講:「唔好諗你所面對嘅困難同失敗,只要記住你想成功,就會成功!」

肥谷話大陸有好多一流喜劇演員,基本功好好,佢叫我不妨到大陸「尋寶」。

肥谷對小谷嘅支持,不但出錢出力,仲不時向小谷教授人生道理,「無論做私房菜也好、糖水舖又好,老闆就好似導演,先要了解觀眾口味,之後靠你嘅功力,令每個角色(菜式)活現出嚟。」我知道肥谷導演嘅《家有囍事2009》,喺香港同內地都有唔錯嘅口碑同票房,佢就話今次最難得係令佢更加清楚內地人對喜劇嘅口味,「知道大陸人想食啲咩!」

「因為套戲喺中國唔同嘅地方上映,所以之前我有機會同內地嘅官員、導演同演員交流,佢哋令我明白到拍戲就好似煮一餐飯,你要先問咗人哋唔食啲咩,然後再喺一個特定範圍內發揮你嘅創意,咁樣你先會確保人哋食你煮嘅嘢。」肥谷話即使係喜劇,內地都要求有品味、高水平。咁佢點樣捉摸內地人「有品味嘅笑位」呢?「唔同嘅地方,我哋會配唔同嘅對白,我每次都會搵番當地嘅編劇去度對白。佢哋話畀我知,原來大陸人係最憎人扮佢哋,因為你永遠都唔會扮得似。」

因為對白貼近當地文化,所以內地觀眾十分受落。佢仲創造咗一個難得一見嘅現象,「當地編劇話內地觀眾喺戲院睇戲係唔會睇到放聲大笑,因為佢哋睇慣馮小剛式喜劇,慣咗返到屋企,諗番套戲先至會有會心嘅微笑。」其實喜劇同甜品一樣,最大功能就係令人開心,觀眾睇完笑住走,食客食完覺得好滿足,即係代表導演成功咗啦!

留家廚房

地址:天后清風街9號地下
電話:2571 0913