為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2022 年 08 月 31 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

人情味的價值

認識企業傳訊專家關則輝多年,主要都係工作往來,特別係佢服務嘅公司出業績或者有重大投資者舉動時,就有機會同關兄碰頭。早幾個月關兄退休,我喺中環撞到佢,見佢一身筆挺西裝和招牌袋巾,仲以為出返山,原來佢趕住去理大教書。佢話教企業傳訊,第一樣要教學生尊重場合、尊重傳訊對象,因此以身作則,執到正入課室。
衣着同言行要考慮場合同受眾,所以關兄笑稱佢平日經常街坊裝,事關佢日日「落區」會街坊,忙過返工。關兄落區當然唔只歎奶茶蛋牛治咁簡單,佢其中一項公職係社區投資共享基金委員會主席,所以區區都見到佢身影。
社會發展有四大動力,首先當然係經濟資本,另外有人才資本和文化資本,最後講到社會資本,要請教關兄到底係咩同點樣投資?簡單嚟講,社會資本就係人與人之間嘅互動、機構之間嘅互補。假如喺社區內我同你互相認識,你有嘢要人幫我會行多一步去幫,就可以各自發揮所長,結成互相守望嘅網絡。好似有啲區好多劏房戶,小朋友下晝放學無地方做功課,後來有義工串連到區內一啲小食店,剛好嗰段時間無乜客,於是開放店內位置畀小朋友用。亦有舊區較多患腦退化老友記,好容易走失,而佢哋往往會走咗去車站,於是有社區網絡同車站附近店舖商量,請佢哋留意下。

社區投資共享基金委員會主席 關則輝

 


投資講回報,社會資本又如何?關兄認為最能夠體現社會資本嘅作用就係逆境時,好似日本出現重大天災之後,我哋見到日本人互相幫忙,關心人哋嘅需要,少埋怨,唔搶購,一齊用少啲電等,呢類為人設想嘅行為正正就可以體現社會資本嘅價值。
呢種民間力量亦可以補充公營機構覆蓋唔到嘅罅隙,因此社區投資共享基金其中一項工作就係資助地區計劃,地區居民、義工、機構可以一齊結網。一個例子係慈雲山「糧朋好友」計劃,由基金出資同有心人捐食物,夾埋幫助唔方便出街嘅老友記和鄰居。另一例子係皇后山邨新入伙,基金支持幾項計劃協助居民適應新環境,由居民做義務樓長,負責留意住戶需要,希望能建立網絡,令居民對社區更有歸屬感。
社區信任和團結確實有預防作用,好似關兄早年參與過天水圍一個計劃。當時呢個社區嘅婦女,特別係新來港婦女生活圈子好窄,有事想向人傾訴又無乜朋友。當時有計劃想拉佢哋出嚟參加活動,但用咩做切入點?最後想到新移民婦女嚟自不同省市,每人都識煮一兩味家鄉菜,於是搞一個煮餸交流會,吸引佢哋出嚟露兩手,然後透過活動擴大生活圈子,慢慢交流埋學校同生活資訊,甚至互相教導普通話同廣東話,搵到自己嘅價值。
關兄加入委員會十七年,一直樂此不疲,皆因佢都係屋邨出身,自細習慣鄰里互助,因此好認同社區投資理念,而佢最希望見到嘅正正係「區區有人情」。