跟大家分享一個笑話：

一艘船在巨浪中即將沉沒，拯救直升機趕至救人，拋下繩梯，讓船上的十男一女抓住逃生，但由於人數太多負荷過重，直升機搖搖欲墜險象環生，機師慌忙大嗌：「你們其中一人放開手，跳回海裏吧！若沒有人願意犧牲自己，我們全機人便會同歸於盡。」

十個男人你眼望我眼，依然無動於衷，手指頭反而把繩梯愈抓愈緊。這時候，唯一的女人開腔：

「就由我放手吧！作為女人，我早已習慣犧牲自己，把一天廿四小時全部奉獻給子女，把一生青春都付出給家庭……」

十個男人聽後非常感動，不期然一起拍手鼓掌……最後繩梯上只剩下女人獲救。

笑話完畢。訪問開始。

徐濠縈會是笑話中的女人嗎？

為了女兒陳康堤，她開始留長頭髮。「個女同我投訴：『媽媽，我唔鍾意你短頭髮，成個男仔咁！』」

她甚至連性格也改變了，不再黑面鬧人。「未生女前無咁睇得開，會鬧記者；依家唔會咯，畀人偷拍，咪最多唔出聲，因為要做個榜樣畀個女睇。」

難怪，她早已戒絕夜蒲多年。「我依家每朝都六點幾起身，堅持日日送個女返學。」

怒海人生，為人父母，誰也會築起快樂的長堤，讓子女無風無浪地成長。明月光，悠然又照地堂，三十五歲的潮媽，今天想說的，不是橙溝綠、米襯藍的潮話，而是小熊維尼和恐龍班尼的親子童話。

望就咁望啦！

相約徐濠縈在下午三點半訪問，我已經早十五分鐘到達，誰知她更早，三點正已化好妝恭候。

「我其實好守時，生活都好規律，只係雜誌習慣寫衰我。我今日早到，係因為一陣六點三，我要送個女去學溜冰，所以五點半就要走，我驚你唔夠時間訪問。」

這幾年光景，徐濠縈都把心神投放在四歲女兒康堤身上。早上七點陪女兒吃早餐，然後便驅車由港島送女兒到九龍塘名牌幼稚園上課。山長水遠，無非想鋪路入女拔萃？

「望就咁望啦，不過都有好多人考唔入。」

去年開學日子，她和陳奕迅特別一連幾天，兩公婆送女兒返學。「係我迫佢去囉！前一晚佢特登唔瞓㗎！驚唔知醒，送完個女返學，先返屋企再瞓，佢係非一般爸爸。」

每天中午時份，徐濠縈便會準時站在校園門外，和琦琦、任達華一起接各自的女兒放學。

「我個女同琦琦個女好傾得埋，同樣咁貪靚，又成日影相，早前又約埋去東京玩。每日返學阿囡去到門口，都話要等埋Ella（琦琦女兒）拖住手先行入學校。」

午飯過後，徐濠縈又再次出動，帶女兒學芭蕾舞玩溜冰唱合唱團。「我一向不是喪谷個女，我只是就番佢興趣，同埋圓番我心願，因為我細個學了幾年芭蕾舞就無學，所以想個女繼續學落去。正如我只係讀到中學，都想佢將來讀書讀好啲，至少入到大學。」

晚上回到家裏，小康堤不准看電視劇，徐濠縈會陪她看圖書和益智教育光碟，灰姑娘故事是女兒的至愛。

「我細個幾曳，成日好無禮貌用手指指住人。依家做咗阿媽，梗係教個女唔好咁做。我見過佢同人藐嘴，我就同佢講，『你一藐人，就唔係Cinderella（灰姑娘），點解你覺得佢啲家姐醜樣吖？因為佢哋心地唔好，藐人指人囉！』我知佢最鍾意做童話故事中最靚嗰個，教完佢之後，依家佢成日叫啲同學唔好指人添。」

	1
初出道，才19歲，即成為劉德華、郭富城和金城武的MTV主角。	餅印一樣的女兒康堤，成為Eason《life continues》的唱片封套。

佢四歲咋！

有一次，徐的家庭醫生問小康堤：「你鍾意做咩呀？」只有四歲的她居然答：「我鍾意做功課。」醫生即時對徐大讚：「你個女掂呀！」

「當時我望住個女，心諗：『嘩！你唔係呀嘛？咁都得！』

「今年農曆年，我阿媽苦口婆心同我講：『你真係要好好栽培你個女呀！你要再花多啲時間陪佢呀！你個女真係好乖，比起你細個真係乖好多。」

徐濠縈說，小時候的她愛跳來跳去，又不時打她的弟弟，「所以我成日畀阿媽打，不過我唔會體罰個女，我覺得幾曳都好，都唔應該受皮肉之苦，溝通會好過打。」

不會打，但依然會鬧，尤其在女兒做功課時。

「我份人好心急，覺得佢做功課可以做快啲，但佢又好鍾意擦完又寫，寫完又擦，因為要寫靚啲！」

連徐的不少朋友也忍不住口勸她：「嘩！你想點呀？佢四歲咋！」

媽媽最看不過眼的，除了小朋友做功課太慢，還有吃飯也愛歎慢板。

「有時佢食食吓飯停晒手，我就會話打畀爹哋，佢就會好驚，嗱嗱聲係咁扒飯。因為我每日都湊住佢，對佢好嘅時間，多過罰佢，所以佢一啲都唔驚我。Eason就少見啲，而且脾氣大啲，又會咆哮，個女最驚佢。」

十二年情修成正果。「在我30歲生日派對，Eason在鋼琴前彈了一首生日歌，推了蛋糕出來，突然蹲下來問：『May you marry me？』我想都不想便答yes！」	一家三口天倫樂，暫時不會再生。「我抱第二啲小朋友，個女會唔鍾意推開我，佢要霸住我。」

為給女兒返新學校打氣，Eason特別通宵不睡覺，晨早穿人字拖送女兒開學。

你今日做咩呀﹖

點解經常穿一身黑衣？「型啲嘛！又易襯，黑色無咁易出錯。」

三十歲前的日子，徐濠縈可以興起去巴黎小住一個月，有時又和黃偉文飛往英國飲咖啡置新裝，現在一切都以女兒行先。

「我啱啱聖誕先帶個女去東京玩，新年就帶佢去溫哥華，每一次出埠都想同個女一齊，有時自己出街都會心掛掛諗住個女，超掛住㗎！

「老公有時都有少少投訴，話我顧晒個女，依家佢啲衫我又無幫佢理，只係理個女啲衫，咪惟有盡力關心佢嘅健康同事業，煲多啲湯水，燉啲燕窩補吓佢。

「坦白講，佢自己搞image都ＯＫ啦！好似年頭一個樂壇頒獎禮，我見到佢嘅裝扮，嚇咗一跳，問佢：『嘩！你今日做咩呀？你着對拖鞋去頒獎禮？』

「佢話：『唔得嘅咩？』我就惟有話：『得！得！』不過何韻詩都同我講：『算啦！佢着咩都無事啦！』」

曾幾何時，徐濠縈多年前替某牌子時裝行騷，陳奕迅突然拿了一紮花入後台探班製造驚喜。愛如落花流水，淡淡留下印記？

「嘩！嗰次好早期咯，我都已經唔記得，我只係記得個女啲嘢。Eason雖然住同一間屋，有時會幾日都見唔到，我起身，佢至返嚟瞓，佢瞓幾粒鐘，又要出去開工。

「佢實在太忙嘞，我哋一齊十二年，都只係可以同佢慶祝過一次大除夕倒數。」

誰怕講？誰會可悲得過孤獨探戈？明月光，何時才來照地堂？

除了在銅鑼灣投資開樓上時裝店，早前又以性感造型，替SK-II的瞬白智慧面膜拍廣告。	徐濠縈沒有插手老公的衣着，Eason便大膽穿拖鞋睡衣上台攞獎。下次應該輪到穿泳褲。

喊三聲

第一次喊，是在小康堤出生的一刻。

「我係半麻醉開刀，有塊布遮住，當一聽見BB嘅喊聲，再睇到自己BB個樣，我同Eason都喊晒，呢一個係magical moment。」

第二次喊，是在小康堤兩歲上台表演時。

「那一年聖誕，佢要扮小天使上台唱歌。事前校長同我講：『有啲家長見到個小朋友第一次上台表演，會喊了出來。』我仲話：『使唔使呀！』

「點知當康堤慢慢走到台前，一路做動作，一路唱歌，令我諗番當初佢只係一團小包包，咁快就咁大個，我好感動，不期然眼濕濕。」

第三次喊，是小康堤曳曳激嬲媽咪時。

「有時佢激到我差啲喊時，佢會拉住我手臂講：『媽媽笑番！』我問：『點解你咁緊張要媽媽笑番？』佢就話：『因為我錫你囉！』個心即刻冧晒！」

下一次喊，相信是康堤出嫁時。

「我希望可以長命百歲，等我睇住個女成長，到老咗都可以同個女攬攬錫錫，等我織啲冷衫畀啲孫。又希望個女長命百歲，Eason都長命百歲。」

一百年後，135歲的潮媽，會否依然唬嚇老康堤：「戴咗假牙，食飯都食咁慢，打畀你阿爸吖嘞！」

徐濠縈的iPhone內，全部都是女兒的可愛照片，一家三口合照卻欠奉。