為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2022 年 08 月 10 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

在港度假新選擇

疫情曠日持久,訪港遊客幾乎絕迹,加上限聚措施令大型宴會大減,酒店轉以staycation搶攻本地客,加上部分酒店轉為檢疫酒店,因此睇返旅遊發展局數字,上半年酒店入住率按年升百分之七。
香港作為國際金融中心,商務往來同旅遊最終都會恢復,近年不少新酒店落成,可見財團對香港長遠發展仍有信心。其中信和置業(0083)瞄準暑假旺季,旗下香港富麗敦海洋公園酒店上月展開試業,以臨海奢華度假為賣點,據官方預訂網站所示,八月客房已fully booked,九月周末都全滿。
早前獲集團邀請參觀酒店,先睹為快。作為新加坡知名品牌,富麗敦(Fullerton)向來走奢華路線,而香港富麗敦亦係呢個品牌全球第一間度假酒店,因此設計加入度假元素。酒店本身依山而建,面臨南中國海,望出去係無敵靚海景,完全忘記身處香港,所以做度假酒店喺地理上已經贏晒。波浪外型嘅酒店樓高共十六層,分為東西兩翼,室內設計充滿東南亞風情,大堂酒廊用竹藤、木吊扇和熱帶植物作為裝飾,格局開揚,比較似泰國、峇里resort。

陸叔早前參觀富麗敦海洋公園酒店。

 


酒店共有四百二十五間客房,包括九間最受歡迎嘅親子主題房,已經爆到十一月。我參觀咗主要戶型,當中最大特色係戶戶向海,而且八成房間可打通為相連客房,適合一家大細或三五知己一齊入住,有利提高入住率。數到最奢華,莫過於兩間特色泳池套房,坐擁二百七十度海景和戶外陽台。
另外,我見到三樓有六十米長無邊際泳池,可以眺望南中國海和深灣,可謂我嘅dream pool。另配備池中按摩池、鞦韆椅、休憩涼亭和兒童嬉水池,同層亦將會有水療中心,可能要住上三日兩夜至試得勻啲設施。為迎合親子客,酒店地下設置六千幾呎室內兒童玩樂區,畀小朋友放電。餐飲方面,酒店共有五間餐廳,包括中西菜及咖啡廳等,另有一間具四十年歷史嘅沙嗲軒品牌餐廳,主打正宗新加坡菜。當日我同朋友試中菜,下次有機會去沙嗲軒試下。
過去兩年staycation大行其道,住客要求亦越嚟越高,要跑贏競爭對手,除咗環境好、地方大、設施多,都要緊貼市場潮流。有見疫情下大眾重視身心健康,酒店特設創意團隊F.U.N. Desk,以新世代員工作為骨幹,為住客度身設計戶外探索活動,例如日落舢舨之旅、南區步行導賞團、繩降和高空滑索等,盡用南區靚景資源。
信置將環保理念融入酒店營運,例如房間不設塑膠用品及樽裝水,反而每層都有飲水機和玻璃樽;另有自家農場,住客可體驗farm to table,集團亦可藉此推廣綠色生活。
酒店揀呢個時間開幕,相信可以受惠於疫情漸退、旅客增加,加上水上樂園重開可享協同效應。隨住政府逐步放寬隔離限制,酒店準備分階段做宣傳推廣,目前已見到有出年嘅海外booking。而為填補呢段空窗期,酒店計劃拓展企業客戶,如提供企業團體活動(team building)及舉辦會議等,擴大收入基礎。