為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2022 年 06 月 01 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

愛要及時

疫情之下好多人即時想到,有機構或個人需要防疫用品,但抗疫日子耐咗,各種問題陸續浮現,好似學生在家網課,部分屋企並無相關配套,亦有特殊學習需要(SEN)兒童難以坐定定對住部電腦,甚至本來返學有午餐補貼嘅基層學童,留家的話家長就要張羅多一餐。不同市民不同處境,有各種各樣嘅需要。
一路以來都有企業或個人伸出援手,好似美心、大家樂、大快活、太興等都曾捐出餐券,亦有企業捐贈口罩、快速測試套裝、寬頻卡、平板電腦等。另外有健康生態圈平台「大家減齡」召集會員一齊「動」身,幾日內儲到十萬分,捐贈物品外並資助SEN學童視像訓練教材、長者痛楚紓緩服務等。
不過即使大家熱心幫忙,始終會有部分基層市民嘅需要未能照顧到。新世界發展(0017) 喺第五波疫情中快手建立一個物資配對平台「愛互送」(Share for Good),將非牟利機構所需物資,同善心人和企業嘅捐贈配對。呢個做法除可集結社會力量,仲可以將合適嘅物資送到有需要市民手上,唔會浪費寶貴物資。
向來着眼於創新嘅新世界,將科技融入平台,透過網站和手機程式列出機構各項急需物資,捐助者可按清單所示直接捐物資,或透過捐款,由合作夥伴仁濟醫院統籌代購,當中包括快速檢測包、血氧計、數據卡、防護面罩及退熱貼等。

新世界喺第五波疫情中快手建立一個物資配對平台「愛互送」(Share for Good),可以將合適嘅物資送到有需要市民手上。

 


模式類似平日網購,簡單嘅網上動作,一click即捐,首月已獲過百間機構響應捐贈,且獲各界名人鼎力支持,包括老友馬時亨教授、港大醫學院院長梁卓偉和影帝郭富城等,籌募及配對逾四千萬港元捐款及物資,惠及超過十萬個弱勢家庭。
雖然疫情漸趨緩和,但近月糧油食品價格飛升,為紓緩基層三餐之憂,平台喺上月進入第二階段,受惠機構倍增至六十間,特別新增與食物援助相關嘅機構。而捐贈清單亦加入食物類別和個人護理用品店現金券,目標共籌六百萬件各類物資,「大家減齡」將加入成為支持夥伴。物資要用得其所,亦要送得及時,繼送貨平台Lalamove率先支持後,順豐香港亦加入成為今階段物流夥伴,免費提供物流運輸服務。
之前多次寫過ESG,事實上ESG已經成為企業首要工作之一,亦係投資者衡量公司嘅重要指標。上月Tesla被剔出標普500 ESG指數,即有分析員降低公司目標價。有人質疑,Tesla做電動車為環保出力,為何仍被除名?  確實,Tesla在「E」(環境)方面貢獻良多,但「S」(社會)和「G」(管治)卻屢被詬病。企業營商時能夠充分考慮社會各持份者,才能令ESG工作更完備。
早前見到中銀人壽總裁鄧子平(Wilson),即時恭喜佢公司獲「卓越財經大獎」,佢同我講最高興係今次獲得「公益企業」獎項,肯定公司嘅ESG表現。佢認為ESG並非單單照顧業務相關嘅持份者,而係要顧及社會整體正向發展。好似初創企業未必有足夠資源發展ESG,中銀人壽加入成為相關加速計劃嘅策略夥伴,為初創提供ESG及業務發展配對和支援,務求做到共同進步。