傳承無花果精神

對於英皇書院舊生，近期最大新聞係校園裏面一棵無花果樹不敵豪雨倒塌，幸好並無傷及任何人，但旁邊噴水池石柱則被波及受損。我由一九六三至七○年喺英皇就讀，並無親身見證學校種植無花果樹，但印象中入學時棵樹已經頗為高大。無花果樹身處嘅小花園，旁邊係教員室和校長室，加上我讀理科，實驗室喺另一邊，所以平日好少會去花園。因此對於無花果樹嘅印象係由課室遠觀，甚少流連近看。
至於棵樹嘅由來，有熱心校友查究後認為係一九六一年由郭士熙校長種植，但又有校友搵到一本一九七六年嘅金禧校刊，裏面考證小花園在戰前名為Palm Court，而當時所有相片都見唔到無花果樹嘅蹤影，因此推斷戰前花園種嘅係棕櫚樹。戰後相片就開始見到東南角落有無花果樹，所以呢位作者估計有可能係種子跌入校園嘅自來樹。
無論係有心栽花定無心插柳，呢棵無花果樹對每個英皇學生都意義重大，甚至我哋本校刊都叫做「The Fig Tree」，原因係無花果樹代表學校「只求結果，不重開花」嘅樸實風氣，半個世紀以來一直係母校嘅象徵。由於無花果嘅「花」藏喺果入面（事實上「果」本身就係花朵、花蜜和花托），外表見唔到，所以又有含蓄、內斂嘅意義。英皇係官校，學生係靠成績派位入讀，好多都來自基層家庭，作風平實係自然嘅事。

一班英皇舊生舉辦千禧論壇，陸叔當時為籌委會主席。

今次無花果樹塌下，學校和舊生都非常關注。有校友share一份資料，呢棵無花果樹學名係青果榕，高十四米，樹冠闊十二米，原來多年來一直受小木蝨損害，雖然用好多方法救治，但都做定兩手準備，三年前已經喺花園移種一棵新無花果樹。今次新樹都有受損，但經樹木專家評估，相信可以慢慢復原，現時正在原位養傷。
至於原有無花果樹，雖然未能起死回生，但校友都希望能夠保留部分枝幹留念，故已將未畀蟲蛀嘅樹幹和樹枝切割出來風乾，日後再決定用途。未有倒塌嘅樹幹和樹根，由於不規則嘅傷口容易造成細菌感染，已即時鋸齊，有待研究再決定係咪保留樹根。
好奇之下，我都上網查過，我哋棵無花果樹Ficus carica，亦叫做common fig，而大角咀有一條「詩歌舞街」（Sycamore Street），原來意思都係無花果，不過係另一種原生於非洲、中東嘅Ficus sycomorus。無花果曾經係地中海、阿拉伯一帶主要食糧。今時今日，由於無花果好有營養同食療價值，有人稱之為超級食物，日本人仲叫佢做長壽水果。
青果榕嘅榕果亦係好多雀鳥嘅食糧，在郊外更會有動物喺樹上棲息，可以話一棵樹孕育無數生命。我個人覺得，生命有始有終係自然循環，校園裏面種植新樹，意思係將無花果精神延續落去；同人和企業一樣，長江後浪推前浪，至係保持生命力嘅不易之道。