東鐵終於嚟到我屋企

港鐵東鐵綫邁入新里程，動工超過十年嘅沙中綫終於全面開通，成為本港第四條過海鐵路，五分鐘就能由紅磡直達會展站，無疑係港人福音。對於家住灣北嘅我，更加係望穿秋水，睇住會展站由二○一五年起動工，途中幾經波折，至今終於正式啟用。
上星期有幸獲港鐵邀請，同管理層一齊參觀會展站，先睹為快。一共三層嘅會展站係過海段唯一新車站，包括車站大堂同兩層月台，站內加入唔少設計元素，以灰和綠作為主色，當中不乏「打卡」位，例如大堂和月台都有展示本地藝術家作品；頂層臨海牆身則由千二幅維港海面照片組合而成，有面迎海港之意。芸芸展品中，最矚目莫過於施工時發現嘅二戰炸彈彈殼，公眾更可觸摸體驗。另外，兩層月台亦設有歷史展板，乘客可回顧東鐵百年演變及建造過海段歷程。

港鐵財務總監許亮華（右） 和陸叔試坐沙中綫新車。

望住展板上嘅相片，勾起我年輕時搭「火車」點滴。中學時家住九龍，港島返學，如入新界多數係假日遊玩，例如約埋同學入紅梅谷或林村野餐，所以當年搭九廣鐵路（東鐵綫前身）雖然唔算快捷方便，但等同入新界玩，帶來好多開心回憶。當時墨綠色嘅柴油火車卡，行車時轟轟作響，車廂並無冷氣，所以一般都會開窗，但當有運豬車經過，就會迎面吹來陣陣臭味，大家會趕忙閂窗。由九龍入沙田要經隧道，為免煤灰飛入車廂，乘客亦例牌極速閂窗，我仲記得入隧道後所有車廂燈都會熄晒，完全漆黑一片。
六、七十年代新界尚未形成新市鎮，沿線車站只得寥寥數個，經過獅子山隧道後就係沙田，窗外風景驟變，鄉郊景色濃厚，與人煙稠密嘅九龍形成強烈對比。後來隨新市鎮迅速發展，市區人口大量遷入新界，東鐵逐漸成為港人嘅日常交通工具。為應付市民所需，除咗全面改為電動列車之外，鐵路網絡亦不斷延伸和加站。其實政府早於一九九八年已提出沙中綫定綫，希望能縮短跨區通勤時間，同時分流陸路交通。項目喺○二年由九廣鐵路成功中標，但後來經歷兩鐵合併，變相由港鐵負責，並延至一二年先正式上馬。
以往喺繁忙時間要過海，我好多時會搭地鐵避免塞車，但一般都要轉車先到目的地。新綫通車後，由屋企行去會展站只需幾分鐘，車程五分鐘就能直駁紅磡，睇演唱會最方便。對於新界東上班族更係一大喜訊，一程車可以直接過港島，唔使喺九龍塘站轉車，慳到唔少時間。
東鐵延伸至港島，同時可打通中港任督二脈，日後兩地恢復通關後，由羅湖或落馬洲，可直穿港島政經核心區，相信到時可帶旺灣北一帶。另外，北部都會區將成為香港新經濟核心，但跨境鐵路開通需時，沙中綫可填補呢段空窗期。
會展站動工時，我搭車仍要畀全費，結果左三年、右三年，等到正式啟用我已可享兩蚊優惠。期望未來北環綫可帶我去新界更多地方，兩蚊鐵路遊。