劏豬界型男

因為一個豬肉切割員，令荃灣新村街的豬肉檔，從此好生意起來。
阿威，36歲，你以為你匿喺橫街的豬肉檔，就搵你唔到咩？冇用o架 ！
睇你一頭金髮，銀鏈配反領Tee，潮人戒指襯紋身，口罩根本遮掩唔到你深邃嘅黑眼睛，同埋一對性感粗眉。好似你咁耀眼嘅男人，即使係歷盡滄桑嘅師奶大嬸或靚太，都會把持不住，迷得暈陀陀。
有人話你有Mirror成員AK的神韻，亦貌似沈震軒，又係MC張天賦和羅志祥嘅混合體，其實你根本係漆黑中嘅螢火蟲，咁鮮明，咁出眾！
你憂鬱而暗帶笑嘅眼神，唏噓嘅鬚根，神乎其技嘅刀法，即使手上面冇拎住一杯Dry Martini，都已經吸引到唔少女顧客蜂擁而至，為咗一睹你風采，同你合照打卡，幫襯幾百蚊豬肉，由荃灣拎返去鰂魚涌都冇所謂。「平均一日會有三十幾個客同我合照。」

 

自從你嘅照片在網路瘋傳，一夜爆紅，你沒有飄飄然，幻想自己會成為少女偶像，就隱瞞已婚身份，更大方承認育有兩個小朋友，好一個暖爸。「我平日喜歡為家人煲湯，大時大節會由我下廚。我亦樂意教吓街坊點樣煮餸。」
任何人上前邀求合照，你都來者不拒，有網民表示要排了一陣隊才能合照成功。就在母親節當天，你相當有心，凡幫襯你買豬肉，你都會送上一支康乃馨作為小禮物，很窩心，可見你的太太真幸福。
從前做過地盤的你，不覺間已劏了豬6年，早視這一行為終身職業。
「當初由學徒到現在，我都係咁喜歡呢門手藝，我希望可以將所學到嘅嘢，慢慢教導下一輩，多認識呢一行。」
昔有庖丁解牛，追求的，是道。今有阿威劏豬，希望的，是傳承。