為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2022 年 05 月 04 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

年輕企業「家」

最近香港疫情靠穩,社交距離措施放寬,帶動新盤銷售,相比三月僅錄約一百六十宗一手成交,地產代理估計四月應有過千宗。本地新樓盤一向係裝潢市場重要推動力,早排我同達明集團行政總裁余俊豪(Alex)以及ESSERE生活色彩集團創辦人馮焯衡(Jackie)傾偈,兩間公司都係梁志天設計集團(2262)主要供應商,可以反映裝潢行業喺疫情下嘅發展情況。
Alex先講入行經歷,原來佢爸爸係油漆工人出身,對牆紙有特別情意結和執着,因此一九八一年創立達明,並一直專注歐美牆紙產品。爸爸為公司打下穩固根基,到Alex接手,決定由「家」嘅概念出發,逐漸將業務拓展至地板、數碼印刷以及家具等領域,希望實現客人對於居住環境嘅心中所想。目前達明代理超過一百個世界各地品牌,足迹遍布大中華地區和東南亞國家。單計香港市場,上年公司為超過三萬個住宅與商業項目供應牆紙。
疫情改變港人生活模式,以往好多人習慣出街食飯應酬,或因工作忙碌而怱忙快吃,但現時居家抗疫,人人「食自己」,造就不少民間廚神。好多人甚至考慮將廚房大翻新,變相帶旺廚櫃生意。作為兩大頂級意大利廚櫃品牌代理商,ESSERE訂單量於疫情期間有增無減。然而,因為所有產品都需要度身訂製,配件無論大小均由意大利原裝進口,所以公司近年飽受物流亂局影響。Jackie分享,正常空運一套廚櫃到港約需六至七萬元(港元,下同),但油價高企下,價格曾上漲至二十萬元。公司以準時履行訂單承諾為首要考慮,縱使知道利潤空間被大幅壓縮,亦硬着頭皮承擔天價。

陸叔與兩位年輕企業家馮焯衡(中)和余俊豪(右)對談。

 

達明所售貨品同樣來自歐美,各國封城耽誤生產周期,貨運供應鏈亦受到干擾。好在公司於香港仔自設四萬平方呎倉庫,儲備大量存貨,有助減輕運輸成本上漲壓力。Alex解釋,以現有存貨水平,即使一整間酒店突然要貨,公司亦有能力快速交付,比起大部分同業更具優勢。
Alex和Jackie都係年輕人,佢哋如何為業務注入創新活力?ESSERE注重用家生活品質,Jackie希望喺設計方案上體現創新理念,結合創意、技術、美觀和實用元素。而Alex就早在十年前已為達明引進企業資源計劃(ERP)系統,幫助管理層獲取實時營運資訊和制定決策,提升業務效益。
問到電商有否影響生意,佢哋異口同聲指網購只供應成品,與公司業務有別,兩間公司均提供技術支援,包括環境考察、計算尺寸、跟進批次等。再者,廚櫃安裝涉及風火水電,ESSERE針對嘅市場比較niche,較容易維持競爭力。
Alex九六年加入達明,見證公司由不到十名員工至今日團隊超過二百人,營業額亦由每年幾百萬元增加至數以億元計。公司正籌備於香港上市,以加快門市鋪設,目標於亞洲區共開設五百個零售點。
講到宣傳,兩位年輕企業家都妙語如珠:「牆紙地板唔用達明,朋友都當你哋透明」、「廚櫃唔搵我Jackie,朋友都當你crazy」,夠晒出位。