投資新「貴」NFT

現實世界因疫情而冷清淡靜，但虛擬世界卻熱火朝天，投資者殺入元宇宙炒買NFT。據加密數據追蹤網站DappRadar資料，上年NFT總交易額約二百五十億美元，一個頭像、一個jpg檔案，以至一條短片都可以買賣。
NFT全名係「非同質化代幣」（Non-Fungible Token），以往嘅「幣」都屬於同質，每枚Bitcoin每張一百蚊紙，價值都均等，可以互換同分拆。不過NFT就相反，每枚都獨一無二，雖則為代幣，但實際上係數碼收藏品或數碼資產。
以往網絡世界嘅影片、圖像、音樂等，撳個掣就可以無限複製，難有真假之分，因此如作為一種資產就難以取得高價值。但透過區塊鏈技術，可以將虛擬資產代幣化，打造成NFT。由於每枚NFT都不可複製，上鏈後紀錄無法更改且公開透明，可驗證虛擬資產來源，起到防偽作用，從而提高收藏和投資價值。創作者或持有人可對應加密貨幣釐定價值，喺交易平台上進行買賣。
藝術品真迹固然珍貴，觸不到嘅一樣價值連城，好似俄羅斯冬宮博物館上年以NFT形式拍賣五幅高清jpg名畫，包括達文西、梵谷等作品，並有館長簽名同簽署時間，最終以四十四點四萬BUSD售出。蘇富比順勢推出「蘇富比元宇宙」NFT平台，上年NFT總拍出約一億美元銷售額。

NFT作為投資新「貴」，大家應該認識，但如以投機角度參與，就要清楚佢嘅投資價值「貴」得有冇道理。

NFT並非單單係富豪玩意，喺連鎖品牌帶動下亦滲透至大眾層面，早兩期都寫過B.Duck推出四千枚NFT，開售半小時就賣晒。以往後生仔排通宵炒限量波鞋，虛擬波鞋一樣渴市。Adidas上年以○點二以太幣（時值七百六十五美元）推出限量NFT，並包含實體產品，上架後火速斷市，至今喺二手市場已升值近四倍。而同行Nike亦收購虛擬品牌RTFKT Studios，旗下每款波鞋NFT都限量一千，最貴嗰對炒到逾十萬港元，可見數字潮物吸金能力驚人。
不過講到炒得最火熱嘅作品，名畫、名牌都比唔上一個頭像。睇返全球最大NFT交易平台OpenSea數據，CryptoPunks同Bored Ape Yacht Club（BAYC）長期位居交易量榜首，而BAYC自上年四月面世後，floor price（底價）至今已爆升千倍至一百以太幣（截稿日約二百四十萬港元），身價絕不「無聊」。
一個普通頭像能夠異軍突起，背後大有來頭嘅並非創辦人，而係一班星級買家。例如巴西球星Neymar Jr、歌手Justin Bieber、香港明星余文樂等名人買入後，紛紛將社交媒體頭像換成NFT作品，形成具影響力嘅植入式宣傳。每個角色都由電腦隨機組合特徵，如膚色、髮型、裝束、表情，特徵愈多愈矜貴，收藏價值愈高。例如CryptoPunks 一萬個頭像中僅有九個為外星人，去年炒至過千萬美元。
我覺得NFT作為投資新「貴」，大家應該認識，但如以投機角度參與，就要清楚佢嘅投資價值「貴」得有冇道理。英國有研究分析二○一七至二一年四月NFT價格，當中七成五平均售價只係十五美元，僅有百分之一高於一千五百美元。美國財政部近日亦警告，NFT容易涉及洗黑錢或非法融資活動，加上現階段欠缺完善監管制度，到底NFT係新經濟抑或新泡沫，仍要拭目以待。