大變動年順勢而行

壬寅虎年到臨，我陸叔祝願各位東周讀者虎虎生威，身體健康，事事如意順心。每逢農曆新年，坊間都有不同玄學家為流年把脈，我都唔例外，再一次請到玄學名家羅奇峰（Raymond），同我哋分享虎年整體運勢。
陸：舊年辛丑牛年，你批算港股會因「水被土制」嘅象數，出現突如其來嘅政策令資金流走，港股出現震盪，而事實上，舊年港股跑輸全球股市，而且出現內房債務危機，中晒你嘅預測。今年壬寅虎年，港股又可否一洗頹風呢？
峰：係呀，陸叔，正因為舊年「水被土制」太過明顯，我一直叫身邊朋友少做少錯，唔做唔錯。今年壬寅年，天干為水，地支為木，表面上都係好過舊年土尅水嘅局面。不過，喺一啲細節上亦有好多地方要留意，概括嚟講今年係一個大變動年。
陸：你所講嘅大變動，係指邊方面？對於我哋最關心嘅投資市場，有咩啟示？

玄學名家羅奇峰提醒讀者在大波動市中須順強勢而行。

峰：首先，從宏觀上分析，二○二四年天運進入九運，呢兩年係八運最後兩年，我地叫「運尾」，八運交接九運進入白熱化局面，好比我哋搬屋、轉工前都會出現一段混亂及適應期，一切會有所阻滯。再者，參考今年流年立春八字，日元為「戊土」，但原局地支及天干木氣非常旺盛，出現群木直尅土局面，戊土明顯處於極為弱勢，技術上會出現「棄命從殺格」。呢個格局好比一個人被山賊脅持到山寨，如果反抗就會被殺，反而聽聽話話，服從命令，成為山賊一分子，可有三餐溫飽。如套用在投資市場，今年大局會被政治、政策因素騎劫，投資市場不能由基本面去主導，因而出現大上大落局面。此外，立春八字另一特點，係壬水偏財透出，本身已代表投機味極濃，而且八字五行完全冇金，水冇金生，代表財冇實際支持，進一步確認投資市場將更為波動。
陸：實際情況同你預測都幾吻合，美國聯儲局已預告今年將多次加息，而中央仍繼續不時調控過熱嘅產業，令環球投資市場一入二○二二年已大幅波動。如果你從玄學角度出發，咩時間要特別留意？
峰：剛才講過，今年流年立春八字為「從殺格」，大凡從格一定要本體弱，順着強勢的五行而行就會好運，最忌係還原變回身旺，有返自己個性。時間上，我地要留意今年夏天，夏天本身係火旺季節，加上今年係寅年，到夏天時半合火局，火旺自己生土，土過強就會令原先從殺格成破格，都係一種不利嘅象數。
陸：最後，我地最擔心嘅新冠疫情，今年有冇機會解決？好多香港人都真係想出外鬆一鬆。
峰：今年《皇極驚世》年值卦為「水火既濟」，本身係一支不錯嘅卦，不過「既濟」卦象為「始吉終亂」，怕在情況好轉受控時大家又得意忘形，最終反而走差。而且有一個重點，就係呢十年《皇極驚世》大運仍行「山風蠱」卦，蠱主病毒、蠱惑人心之象，而呢十年大卦運，要到二○二三年至完結，那麼我預期今年新冠疫情仍難以全面解決，大家仍要嚴加防範，健康為上。