虎年「行」大運

送牛迎虎，雖然疫情下農曆新年應該冇咁熱鬧，但相信大家都健康至上，不如利用幾日假期操fit啲。要抵抗病毒，除咗注意個人衞生、保持社交距離外，持續運動都係一大要素。《英國運動醫學期刊》上年有研究顯示，缺乏運動嘅新冠確診者住院率比其他患者高兩倍，進入加護病房比率同死亡風險亦較大，運動稱得上係天然疫苗。
運動場、健身中心等仍然關閉，但大家一樣可以在家運動。我以往運動淨係會游水，但過去兩年經常冇得游，令我開始改變運動模式。世界衞生組織曾指出，步行係世界上最好嘅運動，每日急步行三十分鐘，以及不少於三公里，已屬中等強度體能活動。前年有人送咗部步行機畀我，於是我即管試用，每日晚飯前都用一個鐘步行五公里，初時有啲吃力，但後來一邊煲劇一邊步行，五公里感覺好快行完。至今已堅持一年半，仲成為習慣唔行唔安樂，肚腩亦細一圈。「運動」呢隻股，長揸果然有回報！

陸叔與黎廷瑤（中）和 張樹槐（右）各有運動方法。

早前同星島新聞集團高級顧問黎廷瑤（黎Sir），同埋馬拉松達人張樹槐（水哥）碰面，除咗談經濟、論時事，傾得最多就係運動心得。投身報界接近半世紀嘅黎Sir，工時長、壓力大，飲食作息日夜顛倒，難免影響健康，因此佢多年前決定建立步行習慣，每日訂下萬步目標，仲每隔兩日上磅，一旦超出警戒線，就會增加步數並控制飲食，以保持健康體重。雖然只係自己訂嘅目標，但黎Sir非常自律，如果當日行唔夠數，返到屋企都要喺廳行到夠為止。
一個人嘅「斤両」確實係反映身體狀況嘅重要指標之一，睇返世衞數據，亞洲成年人標準體重指數（BMI）介乎十八點五至二十二點九。肥胖容易引發糖尿病、代謝症候群及血脂異常等，所以肥瘦唔單止係外形問題，仲係健康隱形殺手。
講到做運動，當然要向身形甚fit嘅水哥偷師，佢曾到六大洲參加馬拉松，包括最高海拔嘅珠峰基地營長跑，仲喺上年完成人生第一百場全馬。黎Sir同我都用步行當運動，到底跑步同步行嘅效果有咩分別？水哥就解釋，步行當然有益，但跑步屬帶氧運動，有利改善心肺功能，並能刺激大腦嘅安多芬（endorphin）和多巴胺（dopamine），有令人開心和減壓作用。另外，由於速度同姿勢唔同，跑步能燃燒更多卡路里，亦較能增強腿部肌肉。步行則對膝關節和心臟負荷較少，相對輕鬆，佢認為大家可因應個人體質而調節步速和運動時間。
唔少人同我一樣，運動初期會覺得辛苦，但後來會越做越起勁，水哥話呢點係源於我哋與生俱來嘅彈復力（resilience），人嘅適應力往往能夠從環境逼出嚟，從而不斷突破自己。佢舉例，美國海豹突擊隊訓練有一個百分之四十定律，隊員如果操練到頂唔順，就同自己講，係身體呃緊你，其實你只係用咗四成體力，如是者不斷提升承受能力。
如水哥所言，運動不但能改善體能，仲可以鍛煉意志、紀律、抗壓力等。大家一於虎年「行」大運，日日跑爆數。