中國天保有「建」「地」

內房遊戲規則不斷深化變革，相信直至樓市回復平穩有序，要喺長期變陣中站得住腳，多元化業務係房企其中一條出路。《十四五規劃和二○三五年遠景目標綱要》中，國家強調碳減排、智能建造、交通強國、公私營合作與REITs、舊區改造等多個發展重點，並將大力投資相關基建。標榜「建築先行，地產跟上」嘅中國天保（1427）有望憑「建」「地」雙重受惠。
要成功把握機遇，自身經驗係關鍵所在。以建築承包起家嘅中國天保喺河北省扎根廿三年，實力獲官方高度認可，在二○一七年取得建築工程方面嘅「特級資質」，代表公司淨資產、過去三年平均收入和工程質量均達至最高標準，可承接更複雜、更高回報嘅大規模樓宇建築項目。上年全河北省僅有十一間企業獲評為「特級」，可見公司在行業地位。

中國天保投融資總監廖子傑（左）。

今年內地樓市動盪，建築業務成為中國天保嘅避風港。公司主要以承建商身份，向發展商同地方政府提供建築承包服務，今年上半年呢部分收入按年升逾一成三，至近七億七千萬元（人民幣，下同），增速高於全國建築業平均。建築收入當中六成來自樓宇建築，其餘四成係工商及基建項目，分布平均，令公司營運更具防禦力。至於上半年新簽合同和未完工合同價值分別約九億二千萬元及四十億八千萬元，有望在來年釋放價值。
中國天保總部位於河北涿州，坐擁首都經濟圈地理優勢，亦受惠於由國家主席拍板嘅《京津冀協同發展》。呢項政策喺一五年出台後，北京、天津同河北積極發展基建，公司近水樓臺先得月，建築業務收入上揚，今年上半年京津冀地區建築收入按年升四成三，貢獻近六億二千萬元。除京津冀外，中國天保同時喺江西、江蘇、內蒙古等市場開拓建築業務，至今覆蓋十八個省份。
調控環境下，公司貫徹建築為主、地產為輔嘅發展策略，二一年上半年地產分部收入錄得一億七百萬元，佔整體收入一成二。收入錄得按年跌幅，但主要由於二○年上半年有三個大型項目完工並交付，因此大幅拉高收入基數。六月底時公司共有二十個發展項目，全權擁有總土儲為一百九十五萬平方米，主要位於張家口和涿州。兩地都受惠於京津冀交通一體化，其中涿州距離北京車程約一個鐘，高鐵到北京西更只需廿五分鐘。城鄉融合發展之下，有北京上班族搬到周邊地區居住，未來將釋放更多房屋需求。
可持續發展係當今大勢，但除咗環保之外，培育人才同樣係可持續發展重要目標。中國天保上年喺涿州動工興建天保智慧建築科技園，建成後將會同清華大學繼續教育學院合作，成立天保商學院，主攻智慧建築研究，為建築行業可持續發展培養專業人才。樓市變幻莫測，中國天保因應政策順勢而為，繼續靈活發揮建築和地產協同效應，並不斷進行內部改革，提升往後嘅應變能力。