為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2021 年 10 月 05 日

召喚珍貴童年回憶 龍炳基笑談星爺大頭蝦往事 

TVB兒童節目一直陪伴著每一位香港人成長,成為不同年代小朋友放學後最期待的電視節目。為了喚起大家美好的童年集體回憶、召喚眾人內心最簡單真實的快樂,由三位資深兒童節目主持譚玉瑛、黎芷珊及蓋世寶擔任主持的《童你一起長大了》,打頭陣登場的是《430穿梭機》一眾主持,除了元祖主持機長張國強及副機長譚玉瑛,穿上製作組專誠度身訂造的機長戰衣登場外,前主持陳嘉輝及龍炳基亦以特別形式登場與昔日拍檔聚首話當年。

與周星馳(星爺)一齊讀藝訓班的龍炳基,1983年加入《430》,並於早年移民美國;透過視像現身龍炳基,談到最難忘往事是經常NG,並大爆兒童節目之寶譚玉瑛姐姐記性超好:「你畀份稿佢,五、六張紙佢都唔漏,標點符號都記得,仲要連你嗰句說話都可以記埋。」他又大談與星爺點滴,並笑謂對方是他與太太的「媒人」:「嗰時幫《黑白殭屍》喺廠度拍Opening宣傳片,我同星仔要喺天窗度跳落嚟,星仔跳先,但佢可能出於本能驚,就縮起咗隻腳,當時我跳緊落去,咁就撞咗落我個鼻骨度,咁就爆咗,我成個鼻歪咗。然後我入咗醫院,但就因為咁識咗我老婆,曾華倩次次見到我都笑問:『你仲係嗰個護士老婆?』」

 

 

《黑白殭屍》當年紅極一時,而當年有份參演嘅曾華倩,亦都靚到揼一聲。

 

龍炳基大談昔日周星馳大頭蝦事件。

 

龍炳基又笑指星爺「大頭蝦」,經常「唔見銀包」或「忘記帶銀包」:「咁佢會點呢?佢住得公司近吖嘛,咁佢搭的士返到嚟,然後就衝入嚟化妝間:『基仔基仔,拎住廿蚊嚟。』我就會問:『又嚟做咩?又唔記得帶銀包?』架的士就喺出面等緊,佢又衝番出去。有時喺Canteen食嘢,佢唔記得帶銀包又係咁:『喂!龍炳基同我畀住錢先。』我諗諗吓,佢有冇畀番晒啲錢我呢?我借咗咁多次錢畀佢。哈哈。」譚玉瑛即打趣謂:「唔怪得我見親佢,佢第一句都係問基仔依家點,可能佢想還番啲錢畀你。」黎芷珊則笑言:「佢(星爺)對我哋冇咁架喎,出去食嘢係佢畀錢架喎。」張國強聞言即開基仔玩笑謂:「你喺佢心目唔係龍炳基,係提款機喎!」由於星爺練開泰拳,眾人指他當年有「泰仔星」之稱,黎芷珊更透露當年星爺最愛找她做靶練腿功,而她則由最初的「大嚇一跳」演變到最後「冇晒反應」。另陳嘉輝則扮演「論盡的工作人員」現身錄影廠與昔日拍檔重聚,由於他低調神秘又古惑,一度嚇窒芷珊與譚玉瑛,場面搞笑。

除了星爺,《430》孕育了梁朝偉、鄭伊健及曾華倩等出色藝人,節目中特別播放了偉仔及伊健當年的精彩演出,片段所見,偉仔早於1987年已是大忙人,除了要周圍飛宣傳,及是拍劇、綜藝、電影三邊走,難得的是他依然謙虛兼一臉稚氣,張國強更盛讚偉仔有跳舞天份:「佢專注力同學習能力都好好,佢好認真想做嗰樣嘢,你想騷擾佢都唔得。佢亦好有自己想法,同埋原來佢跳舞都好叻。」原來偉仔當年在《430》中確實有不少跳舞演出,絕對是相當珍貴的「無綫大寶藏」。

 

 

 

 

《430穿梭機》昔日珍貴照片。

 

《430》第一代女主持人方家瑩。

 

原來《430》開播時,曾上《香港早晨》宣傳。

 

當年的鄭伊健稚氣十足,好年青。

 

周星馳與梁朝偉同框!佢兩個好似默契都唔錯。

 

節目還回顧了譚玉瑛與芷珊的青蔥歲月泳衣照,當年兩人其實均相當靚女,譚玉瑛更笑指著泳衣拍攝是自己一大突破,原來保守的她,當年答應擔任兒童節目主持前曾與監製定下四大守則:「唔袒胸露臂、唔著泳衣、唔著短裙、唔著吊帶」;不過為了節目效果,譚玉瑛還是獻出了「第一次」幕前水著,她笑指該套泳衣,更是問阿嫂借得。

三位主持還找來30多年前參加了兒童節目《縱橫逐格追》遊戲環節的Eva及區太「聚舊」,當時參賽時只有十歲的Eva,現在已是小學校長,她在製作組安排下與母親「回味」當年遊戲過程,今次對手則是區永權及其兩名兒子。Eva與區太均大讚該次參賽經歷讓她們獲益良多,身為校長的Eva更語重心長謂:「童年對小朋友真係好重要,一個小朋友嘅回憶我都可以記到依家,所以我哋成年人真係要諗吓,我哋畀緊小朋友一個點樣嘅童年。唔好將佢哋所有時間都充斥晒有目的嘅嘢,可能真係要畀番啲難忘回憶佢哋。」

 

偉仔當年無論樣子和舞姿都好可愛。