為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 時事速報 2021 年 08 月 02 日

敢創敢試 踏上自主人生路 梓棋:「讀書不代表人生全部。」

  今時今日,很多人花十多年求學,只為求一張大學入場券,奈何大學路未必人人適合,就如今期的主角吳梓棋(梓棋)中四毅然輟學,雖然人生一度陷入迷茫,但最終卻找到自己的理想職業,成就理想。

數年前的梓棋(右)還是個對前路感迷茫的待業待學青年,直至認識計劃社工楊姑娘(左)後,便開始立志投身化妝及美容業,闖出自己的人生。

 

  相約廿二歲的梓棋做訪問,來到她位於荔枝角的工作間,近百平方呎的小小空間,放了兩張美容牀、數部美容機器及一張簡單的化妝枱。「呢度係我舊年開始租嘅小地方,家吓主要收客做面部美容、整眉同幫人化妝。」梓棋介紹說。

  相比同齡之輩才剛大學畢業投身職場,梓棋去年已創業化身小老闆,自資數萬元購置器材及租用這個工作間,然而她笑言一切來之不易。「幾年前嘅我仲係一個雙失青年,日日屈喺屋企唔知為乜。」她憶述。

輟學逃避人生


  自言不是讀書材料的梓棋指,自己曾經也跟不少同學一樣,夢想入大學,「當時個個同學都搏命讀書博入大學,偏偏我就跟唔上,星期一至四每朝都係喊住返學,一到夜晚就失眠,星期五就同班朋友做街童唔返屋企。」這樣逃避上學的日子過了短短一個學期,她便因不堪學業壓力而選擇輟學,「當時父母好震驚,見晒校長、社工最後無奈接受。」她續說。

  輟學的決定讓梓棋踏上一條不一樣的人生路,而起初亦難免荊棘滿途,「開頭報讀咗全日制嘅美容課程,但上咗一個學期,覺得同班同學唔係太相處到,於是無再讀。父母知道之後好嬲,足足成個月無同我講嘢。」再度輟學一度令梓棋懷疑人生,「阿爸阿媽自此無再畀生活費我,於是我日日喺屋企無所事事,過咗成個幾月頹廢日子。家吓回想番,當時嘅我同中學時一樣,喺度逃避緊。」

  為了生活,梓棋最後決定馬死落地行,靠做不同的工作謀生,過着營營役役的日子,「做過餐飲、收銀、時裝店售貨員,日日返十個鐘,返屋企就瞓,第二朝又返工,諗諗吓好無挑戰性,而且愈做愈發覺自己興趣不在此。」然而,究竟哪一條才是屬於她的人生跑道,那刻的梓棋並無答案,直至一八年認識香港青少年服務處社工楊倩雯,參與由香港賽馬會慈善信託基金策劃及捐助的賽馬會鼓掌.創你程計劃。計劃結合跨界別資源,協助十五至廿一歲在學及待業待學青年的生涯發展。

  「記得當時見梓棋,覺得佢份人好內向,自我否定感好重,無乜機會畀佢實踐到自己,發掘咩係自己想做嘅事。」楊姑娘於是為她安排參加塑膠彩、化妝、韓文班等一系列興趣為本的體驗課程,讓她從中認識自己,「後來睇到佢對化妝、髮型設計有一定興趣同能力,於是推薦梓棋申請計劃下嘅獎勵計劃,畀一筆錢佢去嘗試報讀專業化妝課程。」

  不過,與其為梓棋安排一切,楊姑娘反而讓她為自己的職學發展下決定,「我當時主動聯絡計劃邀請過嘅化妝班導師,問佢收唔收學生。就係咁慢慢學,做佢助手累積實戰經驗。」說罷,楊姑娘即續說:「呢類實戰機會好重要,可以讓梓棋了解行業嘅工作環境,有咩甜酸苦辣,同時建立自信,學會肯定自己,所以我一開始都推薦佢喺計劃活動中幫手化妝。」

梓棋感激計劃和社工一直給她機會一步步建立事業,如今她已擁有自己的美容及化妝工作室,生意漸上軌道。

 

學習面對自己

  實戰過程中,梓棋慢慢體會到化妝行業的辛酸,「有次幫手化新娘妝,個客唔滿意,仲講咗一堆相當難聽嘅說話,令我好唔開心。當時個化妝師拍檔同我講,如果決定做呢行,就要學識點面對客人嘅批評,唔可以因為佢哋一句而否定自己,仲要學習點同個客溝通,解決問題。」梓棋憶述。

  化妝師拍檔的一席話,令梓棋明白一直阻礙自己人生步伐的是那份自我否定的價值觀,「以前就係一直逃避問題,如今我決定投身呢一行,就唔可以再係咁,所以我會定一堆短、中、長期目標畀自己去實行。一開始我每星期都網上約幾個模特兒免費試妝,又同一班攝影師、化妝師互相練習切磋。」她說。

  日子有功,梓棋的化妝師生涯因此慢慢踏上軌道,「社工除了會定期叫我返去計劃啲活動幫手,亦有邀請我去學校分享人生經歷。」而說到長遠目標,她即堅定地說:「以前對父母成日誇下海口承諾會努力,呢幾年教曉我講乜都好,最緊要身體力行。兩年前,我第一次畀家用屋企人,阿媽好開心,如今疫情阿媽失業,我亦要幫手交租。責任同壓力大咗,但我唔會再逃避。遲吓仲希望再進修化妝技巧,喺呢一行繼續做落去。」

  楊姑娘與計劃給予的一連串機會,令梓棋脫胎換骨,而對於人生的種種困難,她則認為憑着信念便可戰勝一切,「計劃畀我最大嘅體會係,讀書唔代表一切,人生仲有好多嘢等緊我哋發掘同值得我哋去追求,最緊要唔好避,唔好放棄。」她說。

  馬會慈善事務部主管梁淑儀表示:「馬會主導開展這計劃,透過推出嶄新的人才配對工具,突出個人的『價值、態度、技能及知識』(VASK),全方位呈現年輕人的才能,助他們探索多元出路,並讓僱主能以多角度欣賞人才。」

參與計劃期間,梓棋曾多次獲邀參與社工安排的工作體驗和實習,累積工作經驗和人脈。

 

                           賽馬會鼓掌.創你程計劃 網址:https://clap.hk/
                               Facebook:CLAPforYouthatJC IG:clap_jc