為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2021 年 06 月 30 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

獵頭企業的新商機

呢兩年香港經濟環境欠佳,企業為控制成本,一般都唔會大幅增聘人手,受嚴重打擊嘅行業甚至需要裁員渡過難關,更遑論用到獵頭公司物色人才。高奧士國際(8042)係香港人力資源公司,我好有興趣知道佢哋點樣應對突如其來嘅轉變和挑戰,於是請公司執行董事陳家成(Jackson)和陳家安(Eddie)接受我個新電視節目專訪,分享佢哋於新時代洞察新商機嘅觸覺。
兩兄弟覺得疫情之下有危有機,佢哋留意到因應新常態好多公司轉型求生,反而衍生出工作機會。例如,企業更加注重資訊科技發展,務求應對業務干擾,對相關專才嘅需求有增無減。專責技術領域嘅獵頭團隊上年業績亮麗,錄得逾一倍增長。有見及此,公司未來會繼續配合新經濟增長,加大相關範疇投資。
Eddie補充,高奧士喺二零一九年初進駐內地市場,受惠於當地經濟發展。疫情爆發後,內地政府迅速落實防控措施,使經濟快速重啟,因而吸引港商到內地發展業務,當中包括公司客戶。公司已於深圳和廣州設立辦事處,與客戶緊密合作,可以乘客戶喺內地發展而擴充本身規模。

高奧士執行董事陳家成(Jackson)(左)和陳家安(Eddie)(中)。

 


公司成立十二年,累積豐厚人脈和網絡。Jackson記得有一位從事餐飲業嘅香港客戶希望北上尋覓舖位,適逢一間內地商場發展商有用開公司服務,於是公司穿針引線為餐廳搵到落腳地,亦為開發商招商,創造三贏局面,加深合作關係。
由呢個事例可以見到,公司協助企業客戶請人,唔會淨係對方要人時先「蒲頭」,反而會做足準備工夫,清楚了解客戶嘅企業文化,以及定期更新客戶業務上有冇新需要,至可以幫客獵到最適合人選。另一邊廂,公司亦不斷收集求職者資料,了解佢哋嘅工作經驗、轉工期望,以至所具備嘅軟技能,建立人才資料庫。充分摸清雙方底蘊,公司就可以喺空缺出現時精準配對,達致雙方都滿意嘅結果。
的確,失業率高企情況下,勞動市場上充斥待業人士。不過,現有招聘渠道覆蓋線下線上,五花八門,獵頭公司要擴大人才庫,必須多花心思。孖仔同我講,市面上招聘廣告主要針對主動搵工嘅求職者,但對於有工作在身嘅「被動求職者」,高奧士都唔會忽略,一來可以為對轉工持開放態度嘅人才提供機會,二來可以更大機會促成配對。公司客戶中不乏大型跨國企業,能夠得到佢哋信任,有賴成功個案夠多,和推薦人選合乎佢哋心意。
疫情新常態之下,企業要求人才有更多面才幹,不單單着重求職者經驗,亦關心佢哋是否擁有商業思維、危機處理能力,以及解決問題時夠唔夠創新等。Jackson以商場主管為例,僱主除咗要求應徵者有商場工作經驗,亦希望佢哋能展示出照顧消費者體驗嘅經歷,基本上同請一個品牌經理分別不大。經營環境瞬息萬變,相信企業會愈加屬意通才,高奧士儲備多年嘅人才庫應該可以大派用場,加上團隊肯博識變通,難怪逆市中仍取得驕人
成績。