為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 06 月 24 日

為千八萬元停運 壹傳媒員工質疑:又話仲有五億?

被保安局以涉嫌違反《香港國安法》凍結資產嘅《蘋果日報》,其所屬嘅上市公司壹傳媒(282)本周一召開董事會後,稱因為營運資金不足,傾向關閉《蘋果日報》及《動新聞》,「死線」係今個星期五。採訪部前線員工隨即接獲主管通知,指「同事如決定立刻辭職,可以不用通知,立即生效」。有員工慨歎早已預計公司時日無多,但高層早前明明提及有五億幾現金儲備,足夠營運十八個月,未料如今草草拉閘,員工薪水同遣散費隨時凍過水。
壹傳媒月前曾公布,截至今年三月三十一日為止,未經審核銀行及現金結餘約為五點二億港元。保安局日前引用國安法條文凍結《蘋果》相關三間公司涉及一千八百萬元財產,並未凍結所有資產,計落壹傳媒手上仍有四億幾現金。但現時高層咁快就講到因為唔夠錢營運被迫關門,試問嗰幾億到底去咗邊?莫非有人只係為想打悲情牌,還是有錢都唔使得呢?
消息人士透露,壹傳媒今次被凍結嘅,只係冰山一角。最大筆嘅現金,其實存放喺另一啲戶口,不過被人收得「好鬼竄」,如果貿然攞出嚟用,好大機會引起有關方面注意並將之凍結,變成得不償失,所以索性提早斬纜,煞停《蘋果日報》同《動新聞》。

本周一壹傳媒大樓陸續見有員工執拾細軟離開。

 

早前宣稱有五億幾現金嘅壹傳媒突然「嗌窮」,將無錢出糧個波踢畀保安局。

 


不過壹傳媒內亦另有一種說法,就係黎智英要死得轟烈,「佢一直以來都係用銀彈政策羅致員工幫佢做嘢,達成佢想要嘅目標,一發現唔啱用就會換人,又或榨乾榨淨就即棄,呢刻佢要轟烈,對外話公司無乜錢,仲要加印五十萬份嚟製造輿論,而唔係留番啲錢出糧畀為佢仆心仆命嘅員工,認真令人失望。」
眼見《蘋果日報》苟延殘喘,唔少前線記者都無心戀戰,但求公司盡早處理人工同埋長期服務金。即使選擇留下嘅,亦抱住做一日得一日嘅心態。有工作了二十多年嘅員工坦言:「明知公司遲早會執笠,惟有希望見證歷史,做到最後一刻為止。」
《蘋果日報》呢次因為觸碰國安法紅線而招「滅門」之禍,睇番壹傳媒嘅董事名單,其實殊不簡單。全國政協副主席梁振英留意到壹傳媒董事之一嘅Louis Gordon Crovitz,其妻子Minky Worden(胡丹)與美國及香港泛民主派有千絲萬縷關係。梁振英日前透露,曾喺美國司法部工作嘅胡丹,九二至九八年來港擔任李柱銘私人顧問,每當李柱銘、黎智英及梁家傑等人赴美出席論壇,胡丹必定捧場,佢近年又不時煽動國際社會向中國施壓,動機耐人尋味。

壹傳媒董事Louis Gordon Crovitz嘅太太Minky Worden,近年不時煽動國際社會向中國施壓。