為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 時事速報 2021 年 06 月 22 日

七旬義工化身輪椅維修達人 撐老友記活出快樂

據統計,現時全港有近十二萬行動不便人士,平日需要依賴輪椅、拐杖等輔助工具代步。行動不便除了影響生活,同時亦影響社交,而今期的主角何國雄(雄哥)就決定化身義工,成為一班輪椅長者的關懷大使,傳揚大愛。

訪問當日,七十一歲的雄哥身穿一身運動服,來到位於葵涌的大窩口邨,探望輪椅長者李素香(素香)。「上次嚟已經係一年半前,當時佢部輪椅套剎車系統老化,我上門幫佢拆散架車,清潔、抹油換埋零件,整番好畀佢。」雄哥指着擱在一旁的手推輪椅說道。

年過七十的素香(右起)自從年多前跌倒後,便需坐輪椅出入,而退休義工雄哥早前則與社工偉豪一起上門為她維修輪椅,並鼓勵她多出門融入社區。

 

維修展現大使命


  六年前退休的雄哥,自十七歲起便在巴士公司任職維修員,一做便差不多五十年,如今說起輪椅維修,他笑言「單手都搞得掂」,但卻讓他重拾從事巴士維修的那份使命感。「維修巴士係相當複雜嘅事,當我做咗二十年,積累咁上下經驗,就愈做愈起勁,好畀心機發現邊個零件出問題,再努力想辦法整好佢,同時留意唔同部件嘅老化程度,搞一場大龍鳳整番好架車,心入面自不然有份滿足感,背後為嘅係乘客嘅安全,維修輪椅都係一樣。」他續說。


  對雄哥來說,手推輪椅雖然構造簡單,維修起來也有學問,一切見微知著,「簡單如郁一郁個轆,左右擺就係啤令有事,上下擺就可能係軸心出問題,而邊個地方出問題,往往反映咗長者嘅生活環境,剎車系統易老化就可能代表平時出入嘅地方路面不平多斜路,前轆撞歪就代表成日唔小心撞到石壆。」

  說起維修輪椅的各種毛病,雄哥通通駕輕就熟,更說得頭頭是道,誰不知他自兩年前起,才開始擔起這份義工,從頭學起。「退休之後無嘢做,本打算繼續揸吓小巴、校巴過日晨,但仔女唔畀,於是搵埋一堆義工畀我做,直至兩年前,仔女喺網上見到香港輪椅輔助隊請義務輪椅維修學徒,就先斬後奏幫我報讀課程。」他憶述。

  雄哥口中的學徒課程,實質是「賽馬會耆義樂輪計劃」旗下的課程,計劃由香港賽馬會慈善信託基金捐助推行,「雄哥係第二屆學員,到o依家已經到第七屆,我哋招請呢班退休義工,主要為深水埗、黃大仙、觀塘、九龍城同葵青區嘅輪椅長者維修輪椅。」負責計劃的香港輪椅輔助隊社工吳偉豪(偉豪)說。

計劃招請了一班義工,在工場為輪椅進行大檢查和維修,修理好後再上門交還給長者。

 

化身老友聆聽者

  讀畢一個半月的維修課程,雄哥起初在機構位於南昌邨的維修工場工作,半年後便開始夥拍偉豪,四出做外展工作,並因此認識比他年輕一歲的素香。「三年前喺屋企跌親,跌斷咗右小腿兩條骨,要打石膏,之後就唔敢行咁多,要用輪椅出入,用用吓覺得唔太順就同社工講,佢再轉介吳生同雄哥嚟幫我。」素香說。

  然而,與留守工場維修輪椅不同,雄哥指與社工一起上門,目的並不止為維修輪椅,「其實整輪椅只係次要,主要係想上嚟見吓素香呢一班老友記,關心吓佢哋。」雄哥說罷,素香即嘆了口氣續道:「今個月又喺屋企跌咗兩次,一次向前跌,一次向後跌,個仔叫我去醫院,但我好怕入院,到呢兩日身體先覺得好啲。」

  聽着,坐在她身邊的雄哥和偉豪即提起神來,開始環顧素香家的環境,並問了一堆問題,嘗試找出她經常跌倒的原因,「我哋發現好多長者都同素香一樣,多數都係半夜起身如廁嘅時候跌親,而素香屋企嘅地磚明顯比較滑,加上佢鍾意着平底嘅橡筋鞋,所以容易出意外。」偉豪說。

除了安排輪椅維修,計劃還會按長者的需要,轉贈步行設備,並有物理治療師上門指導長者使用。

 


  偉豪續指,計劃會派出物理治療師上門為輪椅長者評估家中的狀況,為長者提供改善建議,減少家中跌倒的意外,「計劃會收集二手輪椅同其他輔助工具,物理治療師上門評估過覺得位長者適合用邊啲工具,我哋就會安排免費轉贈。好似素香呢類情況,我哋一般會建議佢加裝指路燈、喺廁所加裝扶手,或者改用便椅。」

  此時,本身亦是長者的雄哥,指着素香的鞋說道,「我建議你買防滑膠粒,加喺鞋底度,我以前見過有得買,如果之後見到,一定幫你買。」說罷,雄哥瞬即又躺了在沙發上,親身為素香示範如何安全地起牀落地,相當熱心。「我都係長者,好明白長者好多事需要人關心,幫得到佢哋我固然開心,即使只係推輪椅帶佢哋落街,用隻耳聽佢哋講吓當年舊事,其實都已經幫到佢哋。」

  一個多小時的簡單訪問,素香坦言亦感受到雄哥與偉豪的熱心,「半年前搭的士去睇醫生,之後發現架輪椅撞壞咗,幾日後社工就帶住架輪椅親自上門借畀我用住先,再幫我攞架輪椅返工場整,整完又親自上門畀番我。」她指着偉豪說,並向他連連道謝。偉豪笑着回答:「咁幫你,無非都係想你出多啲街,見多啲人,吸多啲新鮮空氣,人都會開心啲。」話音剛落,雄哥又即插嘴道:「係啊!活到我哋呢個年紀,出入平安緊要,開心都緊要。」

  雄哥一言,正道出了計劃推行背後的意義。香港賽馬會慈善事務部主管王兼揚表示:「馬會多年來與社區夥伴緊密合作,共建長者支援網絡,而我們希望透過計劃在社區招募及培訓義工維修輪椅及探訪長者,推動居家安老,築建樂齡社區。」

               賽馬會耆義樂輪計劃 查詢:2194 9600
                網址:http://www.hkwheelchair.org.hk/ 電郵:outreach@hkwheelchair.org.hk