為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 06 月 16 日

廈門教育集團入主「珠海」 物色校長辦新課程

創校超過七十年,知名度唔低嘅珠海學院,近年招生屢創新低,多次陷入財務危機下,最終易主收場。打救佢嘅「白武士」原來係來自內地國企「廈門國貿教育集團 」,新買家有感疫情下收生不易,有意力挽狂瀾,呢排積極物色執行校長級人選,四出約見本港具教育經驗嘅社會賢達,唔排除開辦中文工商管理碩士等熱門課程吸客。
不過「珠海」校方至今未正式公布新主身份,日前只在校方網頁新增四名校董,當中三人均與「廈門國貿教育集團」有關,包括集團總經理兼黨委副書記杜舉勝、前副經理吳曉強,以及集團附屬公司董事Jane Zhang,令「白武士」身份呼之欲出。

新買家入主珠海學院後,將銳意大搞吸客課程及改革管理層。

 

國貿教育集團總經理杜舉勝成為珠海學院新校董。

 


內地教育集團入主香港高等教育界,令學界唔少人感到訝異。查實一七年十一月成立嘅「廈門國貿教育集團」來頭甚猛,為市屬國企,係廈門國貿控股集團有限公司嘅全資子公司,標榜係廈門首家市級教育集團,投資業務包括學前教育、職業培訓及高等教育等。何解佢哋會睇中「珠海」?聽聞同院校歷史夠耐有關,話晒珠海係香港歷史悠久嘅私立專上院校,知名度有番咁上下,因此新主對「珠海」情有獨鍾,即使疫情下未有太多機會來港考察,仍願意拍板收購,盛傳交易作價約數億港元。
新買家有財力、有人力,要搞番好「珠海」應該唔難。不過香港大專學院呢門生意近年唔易做,疫情打擊下,「珠海」嘅招生情況更加雪上加霜。院校今學年預計收生學額為八百個,但最終到開學只取錄八十二人,連一向最吸客嘅「王牌」新聞及傳播系,亦一度出現零收生。
為咗救亡,新主近排四出約見對香港教育有研究嘅知名人士,包括大專院校前校長等,睇吓有乜靈丹妙藥,順便物色新高層,大刀闊斧改革「珠海」。據聞新主正研究邊類課程最吸客,目標除咗香港學生外,成績中上嘅內地生都係重點招收對象,其中近年好受歡迎嘅中文工商管理碩士課程是其中考慮之一。

國貿教育集團嘅投資業務包括學前教育、職業培訓及高等教育等。