為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2011 年 01 月 18 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

窩心滾熱辣

剛踏入二○一一年,兔年又將至,氣溫又持續單位數字,最啱就係約埋三五知己食火鍋!今晚我再次去到「板獎自家火鍋」,同Ricky San(鄭威濤)、啱啱出碟嘅欣宜,品嘗吓暖笠笠嘅鹿腩湯底,大談新一年嘅大計!

有緣相聚,仲有一眾前「EYT」嘅精英分子:吳家樂、袁彩雲、劉曉彤,齊心力撐欣宜新碟,低溫無損人性味,咁窩心嘅支持,今晚真係愛在心內暖!

一眾「EYT」成員齊集,就算氣溫幾凍,都無損好友重聚的熱情。

前輩全力撐

今晚嘅飯局,我除咗為Ricky San即將有贊助劇集《魚躍在冬季》播映而設外,另一主角就係欣宜。佢啱啱推出咗首張個人唱片《有故事的人》,早前唱片嘅同名主打仲成為流行榜冠軍,哈哈哈!欣宜一向努力做好自己,今次獲得好成績,梗係要好好慶祝吓!

「我好開心有咁多人支持我,今次出碟就好似我真係生咗個BB出嚟咁,〈有故事的人〉係一首我好鍾意嘅歌,而錄嘅時候更加係我錄得最耐嘅一首歌添!

剛從加拿大返港的袁彩雲,都帶備CD讓欣宜簽名。

劉曉彤化身小fans,要欣宜在CD上簽名留念。

「平時我錄一首歌大概要用一至兩個鐘,但係呢首歌我就錄咗成三個幾鐘,期間我同監製試咗好多唔同嘅唱法,成首嗌出嚟就唱到好似嗌交咁,用一個好soft嘅tone唱又好似女人得滯,結果就出現咗依家呢一個喺兩者之間嘅中線位,錄完我仲開心到喊咗出嚟添!」

哈哈哈!欣宜嘅努力,除咗佢嘅Fans見到之外,一眾睇住佢成長嘅「EYT」中堅分子,都好認同小妹妹嘅努力,所以今晚,由加拿大返港度假嘅袁彩雲,仲有劉曉彤,就齊齊化身小fans,帶埋欣宜嘅「BB」,畀佢簽名留念。

鮮魚雜菌鹿腩湯,秋冬必備保暖佳品,正!

魚生就當然係極品之選,火鍋配魚生,一流!

最愛麻辣鍋

欣宜逐一為各姐姐fans簽名,「多謝」之聲不絕於耳,連Ricky San都特別為欣宜買碟,令欣宜喜上眉梢,仲特別向fans們推介多一首歌,「我好鍾意碟入面另一首歌〈夢飛行〉,呢首歌好代表到我嘅心境,而且因為首歌係國語歌,所以我喺演繹嘅時候易好多,你知啦!我啲中文係好有限公司嚟o架,咁普通話同英文嘅相似度又高啲,我喺咬字嘅時候,真係慳番唔少時間o架。」

欣宜真正做到歌、影、視三棲發展,值得恭喜!

哈哈哈!我哋傾吓講吓,除咗傾咗欣宜嘅新碟,佢接住喺24號又有新劇《隔離七日情》播映,加埋賀歲片《我愛HK開心萬歲》,二○一一年都算係佢真正歌、影、視三棲發展,今晚既慶功又慰勞,都要了解吓欣宜最愛嘅火鍋口味,「我食得好辣,最愛梗係麻辣火鍋啦!曾經喺橫店食過一種麻辣火鍋,形式好似涮羊肉嗰啲鍋咁,中間有個cone,喺淥午餐肉嘅時候,我先用個cone煎一煎塊肉,再淥一淥水,嘩!係我食過最好味嘅火鍋呀!」

番茄土豆鹿腩湯,滋味不凡,值得試完再試。

東京灣海鰻,切片之後當魚生食,冬天補身最好,我極力推薦!

半自傳劇集

嘩!欣宜對食有自己一套,而Ricky San就食而優則演,你哋咪誤會,「演」嘅意思係指佢贊助嘅新劇《魚躍在冬季》啫!唔講唔知,劇中男主角Chilam(張智霖)嘅角色,有部分係Ricky San嘅「自傳」嚟o架

「Chilam嘅角色同我一樣,喺好早嘅時候去咗日本學藝,而Chilam學藝好快上手添!如果你話我同佢嘅共通點,可能係我哋都好怕老婆啦,哈哈!

「除咗我借出自己嘅故事畀劇集參考之外,當劇組去到日本取景嘅時候,我公司同事都好幫手咁為佢哋搜羅適合而又珍貴嘅材料,好似只有冬天先搵到嘅鰤魚咁,配合其他有創意嘅菜式,可以畀觀眾寓睇劇於飲食。」

哈哈哈!我哋今晚都係寓食於敍,房內不論火鍋抑或係人情都暖笠笠,力抗冬日寒風,乾!

好友共聚,難得人人都咁支持欣宜,梗係要飲多杯。

Ricky San近期做埋導演,我當然要飲多杯,恭喜佢!

海鰻肝冬日暖胃佳品,正!

蜂巢吞拿魚天婦羅,抵讚!

品嘗「日本第一」
今年Ricky San再次投得寓意好運嘅藍鰭吞拿魚王「日本一」(左圖),雖然「日本一」喺飯局晚上已經全線售罄,但係Ricky San就特意為我預留最佳食用位置,畀我細意品嘗。


板獎自家火鍋
地址:九龍尖沙咀赫德道6號好德商業大廈地庫
電話:2367 6680