為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 06 月 11 日

協調機制啟動 友協統籌「特別選民登記」

立法會日前通過《2021年完善選舉制度(綜合修訂)條例草案》,接下來就進入「特別選民登記」階段。新安排下,選委會當然委員、符合資格登記為選委會界別分組投票人嘅個人同團體,都需要喺七月五日前提交登記申請。
個人登記喺六月一日已展開,建制派中唔少人獲選委會當然委員資格嘅都要登記,不過開始咗成個禮拜,都唔見佢哋現身交表。打探之下得知,其實多數人大或政協身份嘅已經交表,只係佢哋份表唔係交去選舉事務處,而係遞晒去由人大及政協組成嘅「友好協進會」。
消息人士話,中央對今次特別選民登記非常重視,唔想登記環節出錯,尤其選委會嘅當然委員,只要成功登記,其選委資格就隨即確立;若然登記過程出錯,就等於白白浪費一席。為增加安全系數,早前已呼籲各位人大、政協,將登記表先交去「友協」,相關人員收到表後,除咗核對個人資料有否錯漏外,最重要嘅當然係做協調工作。
新選舉制度下,一千五百名選委當中,有一百九十席當然委員屬於人大政協。不過港區人大及政協人數其實不只一百九十人,單是港區政協已超過二百人,港區人大亦有三十六人,換言之,至少有四十六人需要「疏散」去其他界別。

由人大及政協組成嘅友好協進會,將幫手做好協調工作。

 


同樣喺新制下,當事人可以選擇喺有「密切聯繫」嘅其他界別分組登記做當然委員,但中央擔心若任由呢二百三十六人自行選擇的話,有機會出現某些界別太多人或太少人嘅不均情況,倒不如設個協調機制出來做總指揮,全權負責協調工作就萬無一失。
知情人士仲話,協調工作預計要到六月中至尾先完成部署。由「友協」擔任協調角色,聽落點都唔會甩轆,不過中央仍有一個憂慮,就係團體票嘅問題。
主宰特首選戰嘅選舉委員會早前進行「大改組」,多個本屬民主派票倉嘅專業界別改為團體票,有關機構嘅認可資格人士,可以委託一個投票人,例如公司職員或秘書,代為投票。呢點就令中央相當關注,事關投票係採取不記名制度,若然有職員因為政見同委託佢嘅老闆意見唔一樣,分分鐘喺投票時陽奉陰違都未定。所以有關方面呢排不斷「溫馨提示」機構代表,最好由本人去投票,如果唔得,都要授權信得過嘅「自己人」,而呢個「溫馨提示」亦適用於立法會功能組別選舉。

喺新嘅選舉制度下,有一百九十席當然委員屬於人大及政協。

 

特別選民登記已展開,合資格人士需於七月五日前提交登記申請。