為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 06 月 04 日

信和華置送樓大行動 確認包印花稅律師費

新冠疫苗嘅接種率未如理想,為鼓勵市民打針,信和集團(0083)和華置(0127)度咗條好橋,其中轟動全城嘅就係「打針送樓」大抽獎。只要拮兩針就有機會博到觀塘「凱滙」一層逾千萬豪宅,試問邊個唔心動?
香港哋一樓難求,打工仔捱足一世都未必買到一個廁所,因此打針可抽樓嘅消息一出,唔少市民蜂擁去預約打針,網上預約人數單日急增五千幾人,可想而知,送樓呢招係幾咁有號召力。
唔少人好奇,條橋係邊位仁兄度出來?有人估係唔係信和太子爺黃永光?但點都好,黃永光的確好支持市民打針,話希望透過推出大抽獎活動,合力提高香港嘅疫苗接種率咁話。
至於今次送樓行動,係用信置旗下「黃廷方慈善基金」名義送出。黃廷方就係黃永光阿爺,即係信和主席黃志祥嘅爸爸。黃志祥成立嘅基金,過去一直熱心支持教育、醫療、文化及安老等民生發展,做善事扶貧濟困,亦為紀念父親;今次送樓大抽獎,更加體現到黃氏家族呢份助己助人精神。

打針有樓送嘅消息一出,即時吸引大批市民排隊接種疫苗。

 

信和送出「凱滙」千萬豪宅做大抽獎,更送埋印花稅同律師費。

 

黃志祥(右)為紀念父親,成立黃廷方慈善基金扶貧濟困,兒子黃永光(左)都大表支持。

 


今次送出嘅「凱滙」,實用面積達四百四十九呎嘅一房單位,價值一千零八十萬元,有指單位客廳呈長方形,設有露台,景觀夠晒開揚;參與「抽樓」者必須係持有有效香港永久身份證嘅香港居民。
除咗終極大獎可以抽豪宅外,仲有機會贏取由黃廷方慈善基金送出嘅另外二十個、每個價值港幣十萬元嘅預付卡簽帳額或信用卡免找數簽帳額,而且仲係非永久居民都可以參加,即係包括持學生簽證嚟讀書,又或持工作簽證嘅外傭姐姐,都有機會中獎。
不過有網民就擔心,若然中獎人士本身有物業,抽中一層千萬元的樓,印花稅隨時唔少嘢;坊間更有聲音話,若然基層市民抽中層樓,單計找印花稅條數都可能有困難。本刊向信置反映坊間的關注,獲發言人回覆大派定心丸話,呢個終極大獎,係會包埋印花稅、登記費同律師費。
講番賣大包送樓,原來恆基地產都用過呢招,話說旗下新都城第二期喺九八年第三季開售時,發展商同可口可樂聯合推出購買汽水可以抽獎贏取單位,結果吸引市民狂掃可樂,引為一時佳話。