為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 時事速報 2021 年 05 月 25 日

踢走抑鬱 重投社區建連繫 惠明:「多謝大家支持我哋加油!」

  據統計,香港現有十五萬名獨居長者及三十萬名雙老同住長者,面對近期的世紀疫症,他們礙於行動不便,生活、社交及健康都面對各色各樣的困難,所產生的孤獨感更可能導致情緒問題,而今期的故事,便是一個好例子。

自從參加計劃,人稱「朱古力」的義工志雲(左)便不時約惠明婆婆(右)四出參加不同活動,每星期更會致電噓寒問暖,讓她感受到人間有愛。

 

  七十九歲的惠明婆婆,平時需要用拐杖出入。訪問當日,行動不便的她由基督教家庭服務中心社工趙羨婷,以及人稱「朱古力」的退休義工志雲陪同一起,來到位於觀塘的中心。甫坐下她即興高采烈地說:「多謝佢哋頭先帶我去社區會堂上芬蘭木柱運動班。」
 

  惠明婆婆平日經常將「多謝」掛口邊,且喜歡事事感恩,以為她是個「開心果」,豈知卻有段不愉快的過去。「十幾年前仲同個仔住,佢郁啲就發脾氣,踢爛晒屋企啲家具,仲成日打開門大大聲用粗口鬧我,我唔知點解個仔要咁對我。」說起兒子,她即時流下傷心淚。

說起舊事,惠明如今仍會忍不住流淚,有時甚至會有輕生念頭,幸好在社工的協助下,讓她慢慢學會善待自己。

 

告別抑鬱歲月

  每日受盡責罵的惠明,於是寄情工作,即使當年已一把年紀,每周仍做六日清潔工,周末更會到酒樓賣點心,「唯有盡量少啲留喺屋企,而且我唔想靠人養,想自食其力。但係因為細個試過跌落樓梯,家吓變咗舊患,要戴頸箍出街,加上右邊膝頭勞損要做手術,所以近年想做嘢都做唔到。」

  惠明當年心中壓抑的情緒與不樂,她選擇了默默忍受。「諗唔明點解要受咁多委屈,所以成日都喊,仲會頭痛同失眠。好多次,我仲走去度屋企張櫈有幾高,諗住不如用佢爬窗跳落去死咗佢算,但又怕跌唔死反而累人累物。」惠明的淚水不斷地流,她當年所受的壓力顯然不足為外人道,後來醫生診斷她患上了抑鬱,需要定時服藥穩定情緒。

  然而,要真正治好情緒病,最佳的良藥永遠都來自自己,惠明於兩、三年前成功申請一人公屋自住,開始正視自己的負面情緒,踏出正向人生的第一步,並因此認識一班來自基督教家庭服務中心的社工,「佢哋同惠明傾偈,發現搬咗屋之後,原有嘅社交圈子斷晒,變咗成日留喺屋企,所以上年十一月同事轉介惠明參加我哋嘅計劃。」趙姑娘說。

  趙姑娘口中的「計劃」,實名為賽馬會「耆待破隔」長者計劃,並由香港賽馬會慈善信託基金捐助,旨在為居住觀塘區六十歲以上社交疏離的長者提供支援服務,鼓勵他們重投社區,建立人際網絡。

  香港賽馬會慈善事務部主管王兼揚表示:「為改善獨居長者及雙老家庭與社區的連繫及精神健康,計劃除了招募義工關顧老友記的身心需要,亦為長者提供輔導及按其興趣舉辦各類型小組,協助他們積極面對晚年。」
計劃會事先以問卷評估長者的社交疏離程度,「三十分滿分,計劃嘅服務對象係十三分以下長者,而惠明初時只有七分以下。」而為了讓惠明重拾歡顏,趙姑娘安排了計劃的「破隔耆兵」義工朱古力,成為惠明搬家後的第一位朋友。「每星期都會打幾次電話問候近排點、有無咩需要,再睇吓點幫佢。」朱古力說。

  惠明指她眼中的義工朱古力,人如其名般貼心與甜美,「佢份人好好,會幫你買嘢、陪診,又會關心我。」惠明說罷,朱古力即續說:「每個老友記都有唔同需要,好似有一位失明嘅老友記,我就幫佢讀信。」

趙姑娘(右)指,不少長者跟惠明一樣,因行動不便而選擇獨留在家,結果令情緒變差,而計劃就以不同方式鼓勵他們重投社區。

 

重建社交生活

  趙姑娘指,計劃下現有五十位「破隔耆兵」,除了退休人士,還有大專學生。而他們都各有所長,「有啲會幫手做家居小型維修、有啲會幫老友記剪髮,有啲就帶平板電腦上門,網上教老友記做運動。」

  在朱古力的鼓勵下,惠明亦在今年一月開始,參加網上椅上操運動班,最近疫情好轉,朱古力更上門帶她到社區會堂參加實體班,動手動腳兼動腦。「唔使對住屋企四面牆亂諗嘢,個人即時開心咗好多,而且做吓運動,見吓其他老友記,個人精神啲,心情都開朗啲。」惠明笑着大讚。

  除了運動班,計劃還舉辦過智能手機應用班、護手霜製作班、花藝班等不同活動,「我哋班義工會上門跟長者傾談,了解佢哋嘅需要同興趣,再喺唔同區物色聚腳點,度身設計啲活動畀同區長者,藉此幫佢哋建立番社交網絡。」趙姑娘說。

  換言之,社區的支持與健康的社交生活,正是治療惠明情緒的良藥。趙姑娘解釋指,計劃自去年九月推行至今,已服務近一百八十位長者,當中約十分一跟惠明同樣有抑鬱症狀。「呢場疫症中斷咗好多獨居或雙老家庭長者嘅社

  交生活,加上體弱同行動不便,令佢哋更加唔想見人,好多社區中心同公園又唔開放,變相佢哋只能屈在家,結果令行動力、思考反應同認知都變差,心情自然更差,而計劃就想對症下藥。」

  在計劃的支援下,惠明已重拾久違的笑容,而對於往後的晚年生活,她祝願道:「都想多啲人鼓勵我哋加油,快樂做人。」

 

惠明近期主動與其他老友記一起參與芬蘭木柱運動班,讓她有機會動手兼動腦,重拾健康人生。

 

                 賽馬會「耆待破隔」長者計劃 電話:2950 5852
                  WhatsApp: 5598 4227 電郵:engaged@cfsc.org.hk