為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 05 月 23 日

擴建大樓需四年 立會擬先間劏房

新選舉制度下,十二月立法會選舉後,將由原來只有七十名議員增至九十人,以現時立法會大樓嘅議辦數目,絕對唔夠坐。為加位,立會行政管理委員會日前提出喺大樓加建四層,露天花園位置就加建十層,但方案最快二五年中落成,可以話係遠水救唔到近火。距離立選仲有六個幾月,當務之急,係度過臨時過渡方案。
正所謂坐得快好世界,有建制派議員近日連忙商討坐位方案,有人提議「新黎新豬肉」,容許連任成功嘅議員,坐番喺原來嘅議辦,唔使搬!至於新丁議員嘅坐位,就有幾個折衷辦法,包括間「劏房」同租用附近商廈單位。
其中一個,係將現有空置或少人用嘅議辦劏細佢分畀多啲人用。事關部分議員自己有公司,為方便工作,會安排議助去自己公司辦公,而佢喺立會內嘅議辦,通常只留一至兩名同事。咁講法,部分議辦嘅使用率其實唔高,故有人建議將佢納入做劏房名單,實行地盡其用。

仲有六個幾月將誕生新一屆立法會議員,為攞頭位,建制派議員各出奇謀,鬥快爭櫈仔。

 

現有嘅立法會議辦數目不足以應付九十名議員使用,諗計增設臨時房間係勢在必行。

 


除咗劏房呢招,聽聞行管會仲有後着,構思喺鄰近立法會嘅商廈租地方做議辦,對象包括中信、統一中心及海富中心。但據知一班議員嘅反應麻麻,有議員坦言:「商廈保安再好都一定唔及立會嚴密,加上一旦遇到緊急情況,例如要第一時間趕返立會投票,大廈保安未必做到即時鎖升降機,讓議員優先使用。」
議員首選唔多想諗租商廈,聽聞部分業主都對出租一事有所保留,理由係擔心班議員「太惹火」,一旦黑暴重臨,商廈隨時成為「被裝修」對象,得不嘗失。
聽落租商廈呢條橋有唔少阻滯,豈不是無晒辦法?其實仲有第三招!據悉有議員提議徵用立會對開嘅「中環海濱五號用地」,用來興建臨時辦公室。呢塊地本來用嚟興建全新嘅高等法院,由於工程仍未展開,目前只係一塊工地,上面擺放咗貨櫃屋。
徵地提議一出,部分議員當然拍爛手掌,不過話晒打司法機構主意,未知會否引來好大回響。事關重置高院計劃預計二六年完成,若然呢次徵地成功,高院嘅重置大計,恐怕要推遲幾年。