為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 05 月 22 日

肥佬黎資產被凍 壹傳媒員工爆逃亡潮

保安局局長李家超上星期五運用《港區國安法》,凍結肥佬黎持有的壹傳媒(0282)約七成一股份,估計超過三億元,另外再將佢三間離岸公司合共四個本地銀行戶口的資產凍結。
消息一出,壹傳媒行政總裁張劍虹立即發聲明指事件與壹傳媒集團戶口完全無關,又話集團及《蘋果日報》運作及資金財務絕不受影響。到咗今個星期一, 壹傳媒自行停牌,以待發出關於保安局凍結大股東黎智英資產的聲明。
最近坊間一直盛傳《蘋果日報》以至壹傳媒面臨執笠危機,部分消息更話佢過唔到七月一日。空穴來風一定有因,其實肥佬黎喺舊年十二月,因涉欺詐罪被調查後,已遭警方引用有組織罪行條例,凍結咗佢五千二百萬現金,今次李家超再凍結佢資產,據聞所涉四個戶口內,合計只得一百三十萬元。

肥佬黎涉《港區國安法》被扣查及凍結資產,外界推測他的傳媒王國即將沒落。

 


壹傳媒資金鏈隨時爆煲,連外界都感覺到,公司員工當然心中有數。《蘋果》月初就有多名中層人員向高層提議公司先賠錢遣散全體員工,再以合約制重新聘用,直至公司撐唔住為止。有人話咁樣先對得住員工力撐公司多年喎。
不過高層回覆並冇任何遣散或裁員計劃,於是呢幾位中層,包括有副老總、偵查和動新聞的主管等集體辭職,及後突發組一位剛升做副老總的也遞信走人。高層於是開員工大會交代事件,點知員工不滿管理層的取態,港聞、動新聞及突發等再有十多人先後遞信,如是者成間公司就爆發逃亡潮。據聞最快可以散水嘅前線人員,係一班被稱為「蘋果速龍」、專門做遊行示威直播嘅記者,而突發組有不只一人即使喺九五年開報時已入職,眼見勢色不對選擇走為上着。

壹傳媒前景暗淡,最近更爆員工逃亡潮,日日有人遞信辭職。

 

台灣《蘋果日報》停印紙本後,傳聞將會裁員約三百人。

 


有財經分析員認為,壹傳媒業績年年見紅,燒錢速度相當驚人,以往靠肥佬黎以無抵押兼唔收利息嘅條款,私人借錢畀公司頂住。根據壹傳媒去年十二月公布嘅中期業績報告,肥佬黎承諾向公司提供上限七億五千六百萬元貸款,並喺舊年九月前已借出一億元,到十月再借一億五千萬元,計埋之前嘅舊債,壹傳媒累計欠肥佬黎六億半。
撇開肥佬黎筆債唔講,壹傳媒一年內到期嘅銀行欠債約一億七千萬元,長債則大約七億六千萬元。至於公司手頭現金就有一億九千萬元,喺無風無浪日子,算係夠還短債,但喺非常時期,銀行信貸風險部會考慮一連串壓力測試,包括衡量壹傳媒有冇能力在欠缺肥佬黎泵水之下,繼續運作及還錢。
一旦銀行覺得唔妥便會Call Loan,到時勢必火燒連環船,壹傳媒資金鏈恐怕未必頂得住。如果銀行收唔到數,就會鬥快入稟法庭追債,事關早入稟就會最先有機會攞番錢。