演員，需要有過人的想像力，才能駕馭不同角色。既是視帝級人馬，陳展鵬的演技跟想像力，早已獲得肯定。
所以，當女兒陳諾瑤（小豬比）只得兩歲的今天，他已預視到，十六年後會如何寄語自己的寶貝：「爸爸年紀都大啦，未必可以俾到好多嘢你⋯⋯你盡量去發揮，發展你自己嘅嘢！屋企嘅嘢，你唔使擔心咁多，爸爸會搞掂！」
能為女兒撐起半邊天，四十四歲的陳展鵬，也為自己的夢想而努力，「我後生啲嘅時候，夢想係做歌手，而九八年就有機會俾我夢想成真，但可惜當時失敗咗。最初我對再做歌手，都有啲抗拒，畢竟係一個烙印，但我真係好想試多次，用音樂去表達一啲嘢。」
在演員、老公、爸爸的多重身份中，再次添加歌手在內，他的再出道歌曲〈零歲〉，也是給小豬比的情書。藉歌曲教女兒做人的道理，陳展鵬追夢的真心，跟其愛女情切一樣，永遠不會老。

 

同樣是牀照，主角由二變三，幸福美滿。

零歲

陳展鵬不諱言，新歌〈零歲〉既是送給女兒的禮物，也是貼切地形容他的心境。「隔咗咁多年，先再以歌手身份出歌，我好緊張o架，尤其係要Live表演，又要上《勁歌金曲》，之前只係以演員身份，唱吓劇集嘅主題曲、插曲，唱歌只係一個嗜好，極其量都係用嚟搵外快。
「但今次嘅心態好唔同，好似首歌嘅歌名咁，〈零歲〉代表我係要向一班歌手、唱作歌手偷師，同做人一樣，做咩都係keep住學習狀態。」
有今天的感悟，全因廿三年前的他，首次當歌手時太年輕，「以前人哋問我，做歌手係想做啲乜，連我都唔知自己想點，自己究竟係咩定位都冇概念，交晒俾唱片公司處理，其實好出事。
「後生嘅時候，無論事業、愛情都係處於摸索階段。事業上，嗰陣就算我唔清楚自己想表達啲咩，都一心想做歌手，大環境唔好，我就自資置裝做宣傳，使埋自己嘅積蓄⋯⋯到最尾都係失敗，但呢個經歷令我明白，就算做自己鍾意嘅嘢，都會有好多因素，令我未必可以走到最尾。」
可幸的是，陳展鵬的歌手夢上集未能結尾的，今年在他成為人夫、人父後，展開了下集。「今次出歌，錄音前我成日喺屋企練習，o依家年輕歌手，好似林家謙咁，唱歌用氣好輕，同我嘅唱法好唔同，Phoebe（其妻單文柔）初初聽到，就會話我嘅唱法好老土，哈哈！咁我咪練多啲囉，練到小豬比都識得跟住唱。」

上月愛妻生日，即使陳展鵬於前一天仍在通宵工作，一家人還是去了主題公園慶祝。「我覺得咁都好浪漫o架！」