為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2021 年 05 月 13 日

選戰未開 暗箭先發 建制悍將遭「自己人」圍插

立法會選舉十二月先到,喺新選舉制度下,可預計泛民入閘機會大減。正當大家以為選情盡歸傳統建制派,最多都係等分餅仔,沒料選戰未開,政圈近日傳出建制派內有人先發暗箭。
話說呢排社交平台出現多個狂插建制派議員嘅帖文,矛頭直指多位資深議員,中箭人士包括經民聯劉業強、民建聯黃定光、蔣麗芸及梁志祥等。
帖文以「權威評論員」署名,逐一點評呢班資深「悍將」,批評「黃定光你睡醒了嗎?」、「劉業強做了甚麼? 」、「梁志祥可笑可笑 」、「蔣麗芸太個人化」等,認為議會係時候「除老」、「除舊」、「除土」及「去蠻」。用詞句句入骨,相當狠辣,即時觸動一班建制議員嘅神經,派人四出「捉鬼」。點知一查之下,發現原來內裏另有文章。

十二月立法會選舉仍有半年多先到,但建制派內已傳出互放暗箭,氣氛劍拔弩張。

 


消息人士向本刊透露,起初以為該些惡評係泛民中人搞鬼,但再經明查暗訪,卻發現發炮人係來自有建制背景人士。有指該社交平台嘅管理人,部分人曾任職一個知名建制網媒,如今另起爐灶,背後「金主」是誰?為何會出手打「自己人」?目的何在?已掀起各方有不同的揣測。
知情人士話,呢場暗戰極可能是為爭奪十二月立選議席,而非口水戰咁簡單,「自從中央出手為香港政制動大手術,地區直選數目大減至二十席後,對論資排輩嘅建制派大黨明顯有利。相反,一些喺反修例風波後快速彈起嘅建制『網紅』,就好難爭到出線機會。不過佢哋自覺人氣夠旺,累積數萬至數十萬粉絲,希望憑網絡知名度,喺立法會選舉力爭一席。唔排除因為咁,率先喺網絡世界向一班老將挑機。」
政壇需要後浪推前浪,資深「悍將」都深知做議員無可能做一世。之不過有人就質疑,呢班「網紅」有Like唔代表有票,佢哋發動嘅新媒體網絡戰,只顧口誅筆伐太不公道,完全忽略呢班老將喺地區多年來深耕細作嘅貢獻,估計若雙方決定參選立法會,相信選情絕對不會平靜!

 

 

黃定光及蔣麗芸被點名圍攻,惹起政圈議論紛紛。

 

建制派近年湧現一批議論時政嘅「網紅」,吸睛度不下於政客。